اردو حاشہ:
1؎:
ایسے موقع پر استغفار طلب کرنے کی وجہ یہ ہے کہ ”کھانا کھانے کے بعد اس کے فضلے کے نکلنے تک کی ساری باتیں اللہ تعالیٰ کے بے انتہا انعامات میں سے ہیں جن کا شکر ادا کرنے سے انسان قاصر ہے،
اس لیے قضائے حاجت کے بعد انسان اس کو تاہی کا اعتراف کرے،
اس موقع کی دوسری دعا ”سب تعریفیں اس اللہ کے لیے ہیں جس نے مجھ سے تکلیف دہ چیز کو دور کر دیا اور مجھے عافیت دی“ کے معنی سے اس معنی کی تائید ہوتی ہے۔

2؎:
یہ حدیث حسن غریب ہے،
یہ ایک مشکل اصطلاح ہے کیو نکہ حدیث حسن میں ایک سے زائد سند بھی ہو سکتی ہے جب کہ غریب سے مراد وہ روایت ہے جو صرف ایک سند سے آئی ہو،
اس کا جواب یہ ہے کہ یہ حدیث اپنے رتبے کے لحاظ سے حسن ہے اور کسی خارجی تقویت و تائید کی محتاج نہیں،
اس بات کو امام ترمذی نے غریب کے لفظ سے تعبیر کیا ہے یعنی اسے حسن لذاتہ بھی کہہ سکتے ہیں،
واضح رہے کہ امام ترمذی حسن غریب کے ساتھ کبھی کبھی دو طرح کے جملے استعمال کرتے ہیں،
ایک ”لَانَعْرِفُهُ إِلَّامِن هٰذَا الوَجْهِ“ ہے،
اور دوسرا ”وَإِسْنَادُه لَيْسَ بِمُتَّصِلْ“ پہلے جملہ سے یہ بتانا مقصود ہوتا ہے کہ یہ حدیث صرف ایک طریق سے وارد ہوئی ہے اور دوسرے سے یہ بتانا مقصود ہوتا ہے کہ یہ روایت ضعیف ہے،
یہاں حسن سے مراد وہ حسن ہے جس میں راوی متہم بالکذب نہ ہو،
اور غریب سے مراد یہاں اس کا ضعف ظاہر کرنا ہے اور ”إِسْنَادُه لَيْسَ بِمُتَّصِلْ“ کہہ کر اس بات کی طرف اشارہ کیا ہے کہ سند میں انقطاع ہے یعنی اس کا ضعف خفیف ہے۔

3؎:
یعنی اس باب میں اگرچہ اور بھی احادیث آئی ہیں لیکن عائشہ رضی اللہ عنہا کی مذکورہ بالا حدیث کے سوا کوئی حدیث قوی سند سے ثابت نہیں۔

� لغوی تشریح:
«غُفْرَانَكَ» «أَطْلُبُ» فعل محذوف کا مفعول بہ ہونے کی وجہ سے منصوب واقع ہوا ہے۔ معنی یہ ہیں کہ میں بخشش طلب کرتا ہوں۔ یا پھر «اِغْفِرْ» فعل محذوف کا مفعول مطلق ہو سکتا ہے۔ اس صورت میں معنی یہ ہوں گے کہ مجھے بخش دے، اچھی طرح بخشنا۔

فوائد و مسائل:
علاوہ ازیں اور بھی دعائیں آئی ہیں مگر یہ حدیث اور دعا دیگر دعاؤں کے مقابلے میں سند کے اعتبار سے زیادہ قوی ہے۔ علامہ خطابی رحمہ اللہ اس دعا کی حکمت یہ بتاتے ہیں کہ چونکہ یہ وقت اللہ کے ذکر کے بغیر گزرتا ہے اس لیے اس پر استغفار کی تعلیم دی گئی ہے۔

اردو حاشہ:
(1)
قضائے حاجت سے فارغ ہو کر اللہ تعالی سے معافی مانگنے کی حکمت یہ ذکر کی گئی ہے کہ انسان اتنے عرصے تک زبان سے ذکر کرنے سے محروم رہتا ہے۔
اس فطری کوتاہی کو ادباً اپنی طرف منسوخ کرکے مغفرت کی دعا کی گئی ہے۔
یہ وجہ بھی ہوسکتی ہے کہ نجاست کا جسم سے نکل جانا بھی اللہ کی عظمت نعمت ہے۔
جس پر شکر واجب ہے۔
ہم اس کی کماحقہ ادائیگی نہیں کرسکتے اس لیے معافی کے طلبگار ہیں۔

(2)
یہ دعا بیت الخلاء سے باہر آکر پڑھنی چاہیے۔
اگر میدان وغیرہ میں ہوتو فارغ ہوکر کپڑے درست کرنے کے بعد پڑھنی چاہیے۔