640 ۔ اردو حاشیہ:
➊ ”ایک اترتا اور دوسرا چڑھ جاتا تھا۔“ اس سے قلت میں مبالغہ مقصود ہے، جیسا کہ عرف میں اس قسم کے جملے مشہور ہیں، ورنہ تو دو اذانوں کا کوئی فائدہ نہ ہوا۔ امام نووی رحمہ اللہ نے اپنی اکثر کتب میں اس بات کی تصریح کی ہے کہ اذان اول کا آغاز رات کے دوسرے نصف حصے سے ہوتا ہے۔ ان کا کہنا ہے کہ علماء کے ہاں اس کا مفہوم یہ ہے کہ پہلا مؤذن اذان کے بعد بیٹھا ذکر و دعا کرتا رہتا تھا حتیٰ کہ فجر طلوع ہوتی اور اسے نظر آنے لگتی تو وہ نیچے اتر کر دوسرے مؤذن کو اوپر بھیج دیتا تھا۔ خصوصاً اس لیے بھی کہ دوسرے مؤذن حضرت ابن ام مکتوم رضی اللہ عنہ نابینے تھے، فجر نہیں دیکھ سکتے تھے، انہیں اطلاع دینا ضروری تھا۔ لیکن حافظ ابن حجر رحمہ اللہ اس قول کی تردید میں فرماتے ہیں: سیاق حدیث کی واضح مخالفت کے ساتھ ساتھ یہاں اس امر کی بھی ضرورت ہے کہ وہ کون سی خاص دلیل ہے جس کی بنا پر انہوں نے اس معنی کی تصحیح کی ہے اور یہ مفہوم مراد لیا ہے یہاں تک کہ ان کے لیے یہ تاویل کرنا جائز ہو گئی؟ دیکھیے: [فتح الباري: 125/2]
بہرحال لگتا ہے کہ دونوں اذانوں کے درمیان بہت زیادہ فاصلہ نہ ہوتا تھا، اسے منٹوں ہی میں بیان کیا جا سکتا ہے، گھنٹوں میں نہیں، یعنی اندازاً 20، 30 منٹ کا فاصلہ ہوتا ہو گا۔ واللہ أعلم۔
➌ روایت سے ثابت ہوا کہ دو مؤذن الگ الگ اذان کی پہچان کی سہولت کے لیے تھے نہ کہ اس لیے کہ دونوں اکٹھے اذان کہیں۔ اس کا تو کوئی فائدہ ہی نہ تھا۔

535۔ اردو حاشیہ:
نابینے شخص کا اذان دینا یا امامت کا اہل ہونے کی صورت میں امامت کرانا بالکل صحیح اور جائز ہے۔ اذان کے بارے میں ظاہر ہے کہ کوئی دوسرا ہی اس کی رہنمائی کرے گا۔ اور آج کل تو ایسی گھڑیاں بھی ایجاد ہو چکی ہیں، جن سے ایسے لوگوں کو وقت معلوم کرنے میں دقت نہیں ہوتی۔

حدیث حاشیہ:
علامہ قسطلانی ؒ نے نقل کیا ہے کہ صحابہ ؓ کی سحری بہت قلیل ہوتی تھی، ایک آدھ کھجور یا ایک آدھ لقمہ، اس لیے یہ قلیل فاصلہ بتلایا گیا۔
حدیث ہذا میں صاف مذکور ہے کہ بلال ؓ صبح صادق سے پہلے اذان دیا کرتے تھے یہ ان کی سحری کی اذان ہوتی تھی اور حضرت عبداللہ بن ام مکتوم ؓ فجر کی اذان اس وقت دیتے جب لوگ ان سے کہتے کہ فجر ہو گئی ہے کیوں کہ وہ خود نابینا تھے۔
علامہ قسطلانی ؒ فرماتے ہیں:
و المعنی في الجمیع أن بلالا کان یؤذن قبل الفجر ثم یتربص بعد للدعاء و نحوہ ثم یرقب الفجر فإذا قارب طلوعه نزل فأخبر ابن ام مکتوم الخ۔
یعنی حضرت بلال ؓ فجر سے قبل اذان دے کر اس جگہ دعاء کے لیے ٹھہرے رہتے اور فجر کا انتظار کرتے جب طلوع فجر قریب ہوتی تو وہاں سے نیچے اتر کر ابن ام مکتوم ؓ کو اطلا ع کرتے اور وہ پھر فجر کی اذان دیا کرتے تھے۔
ہر دو کی اذان کے درمیان قلیل فاصلہ کا مطلب یہی سمجھ میں آتا ہے آیت قرآنیہ ﴿حَتَّى يَتَبَيَّنَ لَكُمُ الْخَيْطُ الْأَبْيَضُ﴾ (البقرة: 187)
سے یہ بھی ظاہر ہوتا ہے کہ صبح صادق نمایاں ہوجانے تک سحری کھانے کی اجازت ہے، جو لوگ رات رہتے ہوئے سحری کھالیتے ہیں یہ سنت کے خلاف ہے۔
سنت کے مطابق سحری وہی ہے کہ اس سے فارغ ہونے اور فجر کی نماز شروع کرنے کے درمیان اتنا فاصلہ ہو جتنا کہ پچاس آیات کے پڑھنے میں وقت صرف ہوتا ہے۔
طلوع فجر کے بعد سحری کھانا جائز نہیں۔

حدیث حاشیہ:
(1)
امام بخاری ؒ نے ارشاد نبوی کو عنوان کے لیے منتخب کیا ہے۔
یہ الفاظ امام ترمذی نے بیان کیے ہیں کہ بلال ؓ کی اذان تمہیں سحری کھانے سے نہ روکے، البتہ وہ فجر جو اُفق میں عرض کے بل پھیل جائے وہ کھانے پینے کے لیے رکاوٹ کا باعث ہے۔
(جامع الترمذي، الصوم، حدیث: 706) (2)
دراصل صبح کی دو قسمیں ہیں:
ایک صبح کاذب جو اُفق کے مشرقی کنارے پر بھیڑیے کی دم کی طرح اوپر چڑھتی ہے، اس وقت سحری کھانا جائز اور نماز فجر ادا کرنا حرام ہوتا ہے۔
اور دوسری صبح صادق جو اُفق کے مشرقی کنارے کے دائیں بائیں پھیل جاتی ہے، اس وقت سحری کھانا بند کر دیا جاتا ہے اور اس میں نماز فجر ادا کرنا جائز ہے۔
اس مضمون کو امام ابن خزیمہ ؒ نے ایک حدیث سے بیان کیا ہے۔
(صحیح ابن خزیمة: 210/3) (3)
اس حدیث سے معلوم ہوا کہ حضرت بلال ؓ سحری کی اذان کہتے تھے۔
حدیث میں اس اذان کا مقصد بایں الفاظ بیان ہوا ہے کہ تہجد پڑھنے والے گھروں کو لوٹ جائیں اور جو سو رہے ہیں وہ بیدار ہو کر سحری کا اہتمام کریں، یعنی اس کا نام اذان تہجد نہیں بلکہ اذان سحری ہے۔
(صحیح ابن خزیمة: 210/3) (4)
حضرت بلال ؓ اذان دے کر اسی جگہ ٹھہرتے، دعائیں پڑھتےاور فجر ثانی کا انتظار کرتے، جب طلوع فجر قریب ہوتی تو اتر کر حضرت ابن ام مکتوم ؓ کو اطلاع کرتے تاکہ وہ اذان فجر کہیں۔
ہر دو اذان میں قلیل فاصلہ ہونے کا یہی مطلب ہے۔
اس کے علاوہ صحابۂ کرام ؓ کی سحری بہت قلیل مقدار میں ہوتی تھی۔
دونوں اذانوں کے درمیان یہ قلیل فاصلہ اس وقت صحابۂ کرام ؓ کی سحری کی نشاندہی کرتا ہے۔
واللہ أعلم