اردو حاشہ:
فوائد و مسائل:
 
(1)
مریض پرقرآن کی آیات یا مسنون دعایئں پڑھ کردم کرنا درست ہے۔
جبکہ شرکیہ دم حرام ہے۔

(2)
عورتیں عورتوں کو دم کرسکتی ہیں۔

(3)
مرد کو اپنے گھر میں آتے وقت بھی آواز دے کر یا کھانس کر یا سلام کرکے آناچاہیے۔
تاکہ اگر کوئی غیر محرم عورت کسی کام سے آئی ہوئی ہو تو وہ پردہ کرلے۔

(4)
بوڑھی عورتوں کو بھی پردہ کرنا چاہیے۔
لیکن زیادہ بوڑھی عورتیں جن کی جسمانی کشش ختم ہوچکی ہو اگر انھوں نے زیب وزینت نہ کی ہوئی ہوتو ان کے لئے پردہ نہ کرن اجائز ہے۔ (سورہ نور: 60)

(5)
دھاگے پر دم کرکے گلےمیں ڈالنا یا بازو اور کمر وغیرہ پر باندھنا منع ہے۔

(6)
گلے میں پڑا ہوادھاگا یا تعویز وغیرہ اتار کر پھینک دینا مقدس کلام کی توہین نہیں بلکہ غلط کام پر ناراضی کا اظہار ہے۔

(7 تولہ۔ (حب کا عمل)
ایک قسم کا جادو ٹونہ ہے۔
جاہلیت میں عربوں کا خیال تھا کہ اس کے نتیجے میں خاوند کے دل میں بیوی کی محبت پیدا ہوجاتی ہے۔

(8)
خاوند کے دل میں محبت پیدا کرنے کےلئے ٹوٹے ٹونکوں کی بجائے اس کی اطاعت اس کا احترام اس کی خدمت اور اس سے محبت کا اظہار بہتر عمل ہے۔

(9)
بعض اوقات شرکیہ ٹوٹکوں سے بظا ہر فائدہ معلوم ہوتا ہے۔
یہ اصل میں شیطانی اثر ہوتا ہے۔
تاکہ لوگوں کا اعتقاد ایسے کاموں پر پختہ ہوجائے۔

(10)
صاف پانی آنکھ کی صفائی کےلئے اچھی چیز ہے۔
تاہم آنکھ میں چھینٹے زور س نہیں مارنے چاہیں۔

(11)
نظر بد کا اثر بھی شیطانی اثر ہے۔
جس کاعلاج اللہ سے دعا اور مسنون دم ہے۔

(12)
مذکورہ روایت کو ہمارےمحقق نے ضعیف قرار دیا ہے جبکہ دیگر محققین نے اسے صحیح قرار دیا ہے۔
اور اس کے شواہد وغیرہ ذکر کیے ہیں۔
نیز اس پر خاصی طویل بحث کی ہے۔
جس سے معلوم ہوتا ہے کہ مذکورہ روایت سنداً ضعیف ہونے ک باوجود دیگر شواہد کی بنا پر قابل عمل اور قابل حجت ہے۔
واللہ اعلم۔
مزید تفصیل کے لئے دیکھئے۔ (الموسوعة الحدیثیة مسند الإمام أحمد: 6 /110، 113)
والصحیحة للأ بانی رقم: 331، وسنن ان ماجة بتحقیق محمود محمد محمود حسن نصار، رقم: 3530)

(12)
خمرہ ایک جلدی بیماری ہے۔
جس میں جائے مرض کے سرخ ہونے کے علاوہ بخار تیز ہوجاتا ہے۔
بعض حضرات نے اس سے خسرہ وغیرہ کی بیماری مراد لی ہے۔
واللہ اعلم۔

فوائد ومسائل:
1) رقیة یعنی دم جھاڑ پھونک جو کفریہ یا شرکیہ کلمات پر مشتمل ہوں کرنا کرانا حرام اور شرک ہے، البتہ قرآن کریم کی آیات اور مسنون دُعاءوں سے دم کرنا سنت اور باعثِ اجر ہے۔
نیز ایسے کلمات جن میں شرک اور کفر کا کوئی شک شبہ نہ ہو اور تجربے سے مفید ثابت ہوئے ہوں ان سے دم کرنا جائز ہے۔

2) یعنی وہ منکے جو عرب لوگ اپنے بچوں کو نظرِبد سے بچانے کے لیئے پہناتے تھے، تممیہ اور تمائم کہلاتے تھے، اس میں وہ کو ڑیاں، منکے، پتھر، لوہا، چھلے، انگوٹھیاں، لکڑی اور دھاگے وغیرہ سب چیزیں شامل ہیں جو جاہل لوگ بغرضِ علاج پہنتے پہناتے تھے۔
اس میں وہ تعویز بھی آتے ہیں جو کفریہ، شرکیہ اور غیر شرعی تحریروں پر مشتمل ہوں، لیکن ایسے تعویزات جو آیاتِ قرآنیہ اور مسنون دُعائوں پر مشتمل ہوں، اُنھیں تمیمہ کہنا قرآن و سنت کی ہتک ہے۔
اس پاکیزہ کلام کو یہ برا نام دینا ناروا غلو ہے۔
اس میں شبہ نہیں کہ قرآن کریم یا دُعائیں لکھ کر لٹکانا رسول اللہ ﷺسے کسی طرح ثابت نہیں، حالانکہ اس دور میں کاغذ، قلم، سیاہی اور کاتب سبھی مہیا تھے اور مریض بھی رسول اللہ ﷺ کی خدمت میں آتے تھے، مگر آپنے کبھی کسی کو یہ طریقہ علاج ارشاد نہیں فرمایا۔
آپﷺ نے اُنھیں دم کیا یا مختلف اذکار بتائے یا کوئی مادی علاج تجویز فرما دیا۔
آیات یا دُعائوں کو بطور تعویز لٹکانا بعد کی بات اور اختلافی مسئلہ ہے۔
علمائے سنت کا ایک گروہ اس کا قائل و فاعل رہا ہے اور دوسرا انکاری (ملاحظہ ہو آئیندہ حدیث3893) علمائے راسخین کی اور ہماری ترجیح یہی ہے کہ اس سے احتراز کیا جائے۔
مگر کلام اللہ یا مسنون دُعائوں کو تمیمہ جیسا برا نام دینا بڑا ظلم ہے۔

3) محبت کے ٹوٹکے، تعویز اور گنڈے جادو کی قسم ہیں اور شرک ہیں۔

4) حضرت عبداللہ بن مسعود ؑ کی بات سے یہ بھی پتہ چلتا ہے کہ شرکیہ یا کفریہ طریقوں سے لوگوں کو جو فائدہ ہوتا ہے وہ درحقیقت شیطانی اثر ہوتا ہے۔

5) واجب یہ ہے کہ ہر مسلمان ایمان و یقین کے ساتھ مسنون اعمال اختیار کرے اور یقین رکھے کہ جلد یا بدیر شفاء ہو جائے گی۔
اگر نہ ہو تو دقت نظر سے اپنا جائزہ لے کہ دُعا قبول نہ ہونے کا کیا سبب ہے اور پھر صبر سے بھی کام لے اور اللہ کے ہاں اجر اور رفع درجات کا اُمید وار رہے۔