اردو حاشہ:
فوائد و مسائل:
(1)
شفا اللہ کے ہاتھ میں ہے کسی بندے کے ہاتھ میں نہیں۔
اس لئے شفا کی درخواست اللہ ہی سے کرنی چاہیے
(2)
کسی نیک بزرگ شخص سے اپنے حق میں دعا کرانا جائز ہے۔

(3)
بیماری اور مصیبت پر صبر کرنا درجات کی بلندی کا باعث ہے۔
لیکن اس سے نجات کی دعا کرنا بھی توکل اور رضا کے منافی نہیں۔

(4)
ضرورت پوری ہونے کی نیت سے دو رکعت نفل نماز پڑھنا اور پھر مناسب دعا کرنا اس سے دعا کی قبولیت کی زیادہ اُمید ہوتی ہے۔

(5)
صحابی رضی اللہ تعالیٰ عنہ نے نبی اکرم صلی اللہ علیہ وسلم سے شفا کی درخواست نہیں کی۔
بلکہ شفاء کے لئے دعا کرنے کی درخواست کی۔
اور خود بھی دعا کی۔
گویا نبی صلی اللہ علیہ وسلم کی دعا اس شخص کی دعا کی قبولیت کے لئے تھی۔
اس لئے اسے شفاعت کہا گیا۔

(6)
بعض لوگوں نے اس حدیث سے رواجی وسیلہ ثابت کرنے کی کوشش کی ہے۔
حالانکہ اس میں نبی اکرم صلی اللہ علیہ وسلم کی ذات کو وسیلہ نہیں بنایا گیا۔
بلکہ رسول اللہ صلی اللہ علیہ وسلم کی دعا کو وسیلہ بنایا گیا ہے۔
اور یہ پھر نبی اکرم صلی اللہ علیہ وسلم کی حیات مبارکہ میں تھا۔
وفات کے بعد قبر شریف میں آپ صلی اللہ علیہ وسلم کو مخاطب نہیں کیا گیا۔

(7)
رسول اللہ صلی اللہ علیہ وسلم کو وفات کے بعد مخاطب کرنا قرآن مجید کے اس فرمان کے بھی خلاف ہے۔
﴿وَلَا تَجْهَرُوا لَهُ بِالْقَوْلِ كَجَهْرِ بَعْضِكُمْ لِبَعْضٍ﴾  (الحجرات: 2)
 ”رسول اللہ صلی اللہ علیہ وسلم کو بلند آواز سےنہ بلاؤ۔
جس طرح تم ایک دوسرے کو بلند آواز سے پکار لیتے ہو“ بلکہ اس کا ادب بتاتے ہوئے فرمایا۔
﴿إِنَّ الَّذِينَ يُنَادُونَكَ مِن وَرَاءِ الْحُجُرَاتِ أَكْثَرُهُمْ لَا يَعْقِلُونَ و َلَوْ أَنَّهُمْ صَبَرُوا حَتَّىٰ تَخْرُجَ إِلَيْهِمْ لَكَانَ خَيْرًا لَّهُمْ﴾  (الحجرات: 5، 4)
جو لوگ حجروں کے باہر سے آپ صلی اللہ علیہ وسلم کو آوازیں دیتے ہیں۔
وہ اکثر بے عقل ہوتے ہیں۔
اگر وہ لوگ صبر کریں حتیٰ کہ آپ صلی اللہ علیہ وسلم خود ان کے پاس تشریف لے آئیں۔
تو یہ ان کے لئے بہتر ہے۔
اس آیت کا تقاضا یہ ہے کہ حجرہ مبارک میں دفن ہونے کے بعد نبی اکرم صلی اللہ علیہ وسلم کو نہ پکارا جائے۔
حتیٰ کہ قیامت کو وہ خود باہر تشریف لے آئیں۔

اردو حاشہ:
وضاحت:
1؎:
یہی وہ مشہورروایت ہے جس سے انبیاء اوراولیاء کی ذات سے وسیلہ پکڑنے کے جواز پر استدلال کیا جاتا ہے،
بعض محدثین نے تو اس حدیث کی صحت پر کلام کیا ہے،
اور جو لوگ اس کو صحیح قرار دیتے ہیں،
ان میں سے سلفی منہج و فکرکے علماء (جیسے امام ابن تیمیہ وعلامہ البانی ؒنے اس کی توجیہ کی ہے کہ نابینا کواپنی ذات بابرکات سے وسیلہ پکڑنے کا مشورہ آپﷺنے نہیں دیا تھا،
بلکہ آپﷺ کی دعاء کو قبول کرنے کی دعا اس نے کی،
اوراب آپﷺ کی وفات کے بعد ایسا نہیں ہو سکتا،
اسی لیے عمر رضی اللہ عنہ نے قحط پڑنے پر آپﷺ کی قبرشریف کے پاس آ کرآپﷺ سے دعاء کی درخواست نہیں کی،
(آپﷺ کی ذات سے وسیلہ پکڑنے کی بات تو دورکی ہے) بلکہ انہوں نے آپﷺ کے زندہ چچاعباس رضی اللہ عنہ سے دعاء کرائی،
اور تمام صحابہ نے اس پر ہاں کیا،
تو گویا یہ بات تمام صحابہ کے اجماع سے ہوئی،
کسی صحابی نے یہ نہیں کہا کہ کیوں نہ نابینا کی طرح آپﷺ سے دعاء کی درخواست کی جائے،
اور اس دعاء یا آپ کی ذات کو وسیلہ بنایا جائے۔