قرآن و حدیث کو تمام آراء و فتاویٰ پر ہمیشہ ترجیح حاصل ہے
تحریر: محدث العصر حافظ زبیر علی زئی رحمہ اللہ
”قرآن و حدیث کو تمام آراء و فتاویٰ پر ہمیشہ ترجیح حاصل ہے۔ بلکہ ہر وہ رائے اور فتویٰ جو قرآن و حدیث کے خلاف ہے مردود ہے۔“
ام المومنین سیدہ عائشہ رضی اللہ عنہا سے پوچھا گیا کہ عبدالرحمٰن بن ابی بکر کے بچے کی طرف سے ایک اونٹ بطور عقیقہ ذبح کریں تو انھوں نے فرمایا:
«مَعَاذَ اللّٰهِ! وَلَكِنْ مَا قَالَ رَسُوْلُ اللّٰهِ ﷺ: شَاتَانِ مُكَافَأَتَانِ»
یعنی میں (اس بات سے) اللہ کی پناہ چاہتی ہوں لیکن (میں وہ کروں گی) جو رسول اللہ صلی اللہ علیہ وسلم نے فرمایا ہے کہ دو بکریاں ایک جیسی۔
(السنن الکبریٰ للبیہقی ج 9 ص 301 وسندہ حسن، تحفۃ الاخیار 6/ 428 ح 2516 وسندہ حسن، مشکل الآثار للطحاوی 3/ 68 ح 1042، وسندہ حسن، الکامل لابن عدی 5/ 1962، دوسرا نسخہ 7/15)
اس روایت سے کئی مسائل ثابت ہوتے ہیں مثلاً:
1— گائے اور اونٹ وغیرہ کو بطورِ عقیقہ ذبح کرنا جائز نہیں ہے۔
2— قرآن و حدیث کو تمام آراء و فتاویٰ پر ہمیشہ ترجیح حاصل ہے۔ بلکہ ہر وہ رائے اور فتویٰ جو قرآن و حدیث کے خلاف ہے مردود ہے۔
3— سیدہ عائشہ رضی اللہ عنہا کی عظیم فضیلت اس سے ثابت ہے کیونکہ آپ اتباع سنت میں بہت سختی کرنے والی تھیں۔
……………… اصل مضمون ………………
اصل مضمون کے لئے دیکھئے فتاویٰ علمیہ المعروف توضیح الاحکام (جلد 1 صفحہ 646 اور 647) للشیخ زبیر علی زئی رحمہ اللہ

فوائد ومسائل:
1۔
صحیح اور حق بات یہی ہے کہ ساتویں دین بچے کا نام رکھ دینا سنت ہے۔
اور (یدمیٰ) (خون لگانے کامسئلہ) صحیح نہیں ہے۔
جیسا کہ آنے والی حدیث میں ہے۔

2۔
اس طرح بعض لوگ جو اپنے مکان کی بنیاد رکھتے ہوئے جانور کا خون بنیادوں میں گراتے ہیں۔
یا نئی گاڑی خرید کر اس کے ٹائروں وغیرہ کو خون لگاتے ہیں۔
تو یہ بھی زمانہ جاہلیت کی باتوں میں سے ہے۔
جن کی اسلام نے نفی کی ہے۔

بڑی عمر میں عقیقہ نصوص شرعیہ اور فہم سلف کی روشنی میں
” ہر بچہ اپنے عقیقے کے عوض گروی رکھا جاتا ہے۔ ساتویں دن اس کی طرف سے جانور ذبح کیا جائے، اس کے سر کو مونڈھا جائے اور اس کا نام رکھا جائے۔“ [مسند الإمام أحمد: 22,18,17,12,8,7/5، سنن أبى داؤد: 2838، سنن الترمذي: 1522، سنن النسائي: 4225، سنن ابن ماجه: 3165، المنتقي لابن الجارود: 910، و سندهٔ صحيح]

دیگر شرعی مسائل کی طرح اس مسئلہ میں بھی مختلف دلائل کو دیکھنے کے بعد اہل علم کا تھوڑا سا اختلاف ہوا۔ وہ اس طرح کہ اسلاف امت میں سے بعض اہل علم نے کچھ روایات کو مدنظر رکھتے ہوئے ساتویں دن کے ساتھ ساتھ چودھویں اور اکیسویں دن بھی عقیقے کی مشروعیت کا فتویٰ دیا۔ یہ الگ بحث ہے کہ چودھویں یا اکیسویں دن والی روایات رسول اللہ صلی اللہ علیہ وسلم یا صحابہ کرام سے ثابت نہیں ہو سکیں۔ لہٰذا صرف ساتویں دن عقیقے کی مشروعیت والا قول ہی راجح ہے۔

یہ اختلاف تو تھا محض ساتویں کے ساتھ ساتھ چودھویں اور اکیسویں دن کو ملانے کا، رہا ساتویں دن سے پہلے یا اکیسویں دن کے بعد عقیقہ کرنا تو یہ اسلاف امت، یعنی صحابہ و تابعین اور ائمہ دین سے قطعاً ثابت نہیں۔ ہمارے علم کے مطابق خیرالقرون، بلکہ اس کے بعد بھی پانچویں صدی ہجری کے آغاز تک کوئی اہل علم چودھویں اور اکیسویں دن کے علاوہ ساتویں دن سے پہلے یا بعد عقیقے کا قائل و فاعل نہیں تھا۔

پانچویں صدی ہجری میں ظاہری نظریے کے حامل بعض اہل علم نے عقیقے کی احادیث کے ظاہری الفاظ سے اس کی فرضیت کا حکم کشید کیا اور پھر اسی بنا پر فتویٰ دیا کہ عقیقہ چونکہ فرض ہے، لہٰذا بچہ ساتویں دن تک زندہ رہے یا نہ رہے، عقیقہ کرنا ہی پڑے گا، البتہ ساتویں دن سے پہلے عقیقہ نہیں کیا جا سکتا، اگر ساتویں دن بچے کا عقیقہ نہیں کیا گیا تو زندگی میں جب بھی ممکن ہو، عقیقہ کیا جائے۔ علامہ ابن حزم ظاہری رحمہ اللہ (368-463 ھ) کا یہی فتویٰ تھا۔ [المحلي بالآثار: 234/6]

اسلاف امت کی تعلیمات کے خلاف یہ ایک شاذ قول تھا۔ جب یہ فتویٰ دیا گیا تو اسی دور کے محدث الاندلس، علامہ ابن عبدالبر رحمہ اللہ (368-463 ھ) نے سخت الفاظ میں اس کی تردید کرتے ہوئے فرمایا:
«وأجاز بعض من شذ أن يعن الكبير عن نفسه .»
” بعض شاذ لوگوں نے اس بات کو جائز قرار دیا ہے کہ بالغ شخص اپنا عقیقہ خود کر لے۔“ [الاستذكار: 318/5]

بعض جید اور قابل قدر اہل علم کا رجحان بھی اس طرف ہے کہ بڑی عمر کا شخص بھی عقیقہ کر سکتا ہے۔
↰ ان کی اطلاع کے لیے مؤدبانہ عرض ہے کہ حافظ ابن القیم رحمہ اللہ تو ابن حزم رحمہ اللہ سے تین صدی بعد آئے ہیں۔ ان کی طرف سے ابن حزم رحمہ اللہ کی موافقت کوئی فائدہ نہیں دے گی، کیونکہ ان سے تین صدیاں پہلے ابن حزم رحمہ اللہ کے ہم عصر، ہم علاقہ اور ان سے سات سال بعد دنیا سے کوچ کرنے والے عالم، علامہ ابن عبدالبر رحمہ اللہ نے اس فتوے کو ایک شاذ قول قرار دے کر رد کر دیا تھا اور حدیثی دلائل (جن کو ہم بعد میں ذکر بھی کریں گے) دیتے ہوئے فرمایا تھا:
«وذلك كله سواء دليل على أن العقيقة عن الغلام، لا عن الكبير.»
” ان سب احادیث سے واضح طور پر ثابت ہوتا ہے کہ عقیقہ بچے ہی کا ہو گا، بڑے کا نہیں۔“ [الاستذكار: 318/5]

↰ دوسری بات یہ ہے کہ شیخ الاسلام ثانی علامہ ابن القیم رحمہ اللہ نے حافظ ابن حزم رحمہ اللہ سے موافقت نہیں کی بلکہ جس طرح ابن حزم رحمہ اللہ نے ایک شاذ اجتہاد کے ذریعے ساتویں دن کے بعد پوری عمر عقیقے کا شاذ فتویٰ دیا جس میں ان کا کوئی سلف نہ تھا، اسی طرح ابن القیم رحمہ اللہ نے اپنے شاذ اجتہاد کے ذریعے ساتویں دن سے پہلے بھی عقیقہ کرنے کا شاذ فتویٰ جاری کر دیا جس میں ان کا بھی کوئی سلف نہ تھا۔ دونوں اہل علم میں فرق صرف یہ ہوا کہ ابن حزم رحمہ اللہ نے ساتویں دن کے بعد پوری عمر کے لیے مدت عقیقہ میں توسیع کی اور ابن القیم رحمہ اللہ نے ساتویں دن سے پہلے بھی اس کی رخصت دے دی اور ان دونوں میں قدر مشترک یہ ہوئی کہ عقیقے کے مسئلے میں صحابہ و تابعین اور ائمہ دین کا دامن ان میں سے کسی کے بھی ہاتھ میں نہیں رہا۔

↰ اجماع کا یہ دعویٰ بہت عجیب ہے۔ ابن حزم رحمہ اللہ کے معاصرعلامہ ابن عبدالبر رحمہ اللہ کے مذکورہ صریح فتوے کے بعد اس دعوے کی کوئی گنجائش نہیں۔

◈ ابن حزم کے ایک اور ہم عصر و ہم علاقہ عالم، شارح بخاری، علامہ ابن بطال رحمها اللہ کا یہ قول سونے پر سہاگہ ہے، وہ لکھتے ہیں:
«لا يعق عن الكبير، وعلى هذا أئمة الفتوى بالأمصار.»
” بڑے کی طرف سے عقیقہ نہیں کیا جا سکتا۔ تمام علاقوں کے مفتی ائمہ کا یہی مذہب ہے۔“ [شرح صحيح البخاري:375/5]

◈ اس کے بعد نویں صدی ہجری میں علامہ عینی حنفی نے بھی بڑے کی طرف سے عقیقہ نہ ہونے کو تمام ائمہ فتویٰ کا مذہب قرار دیا۔ [عمدة القاري شرح صحيح البخاري: 21 /86]

◈ پھر بارہویں صدی ہجری میں شیخ عبدالوہاب نجدی رحمہ اللہ نے لکھا:
«العقيقه عن الكبير، ما علمت له أصلا»
” بڑی عمر کے شخص کی طرف سے عقیقے کی کوئی دلیل میرے علم میں نہیں۔“ [الدرر السنية فى الأجوبة النجدية: 410/5]

◈ پھر تیرہویں صدی ہجری میں علامہ محمد بن علی شوکانی رحمہ اللہ (م: 1250 ھ) نے لکھا:
«إن وقت العقيقة سابع الولادة، وأنها تفوت بعده.»
” بلاشبہ عقیقے کا وقت ولادت کا ساتواں دن ہے، اس کے بعد اس کا وقت نکل جاتا ہے۔“ [نيل الاوطار: 157/5]

◈ پھر چودہویں صدی ہجری میں علامہ شرف الحق عظیم آبادی رحمہ اللہ (م: 1329 ھ) نے لکھا:
«إن وقت العقيقة سابع الولادة، وأنها لا تشرع قبله ولا بعدہ.»
” عقیقے کا وقت ولادت کا ساتواں دن ہی ہے۔ اس سے پہلے یا بعد میں عقیقہ کرنا مشروع نہیں۔“ [عون المعبود شرح سنن أبى داؤد: 28/8]

◈ پھر اسی صدی میں علامہ عبدالرحمٰن مبارکپوری رحمہ اللہ (م: 1353 ھ) نے بھی لکھا کہ:
«والظاهر أن العقيقة مؤقتة باليوم السابع»
” راجح بات یہی ہے کہ عقیقہ کے لیے صرف ساتواں دن مقرر ہے۔“ [تحفة الاحوذي: 98/5]

↰ یعنی حافظ ابن حزم رحمہ اللہ سے پہلے بھی کوئی اہل علم بڑی عمر میں عقیقے کے جواز کا فتویٰ نہیں دیتا تھا اور پھر ان کے دور سے لے کر آج تک اہل علم دلائل کے ساتھ بڑی عمر میں عقیقے کو ناجائز قرار دیتے رہے اور عقیقے کو بچے کے ساتھ خاص سمجھتے رہے۔

↰ اس بحث سے یہ بھی ثابت ہوا کہ ابن حزم رحمہ اللہ سے پہلے تک اہل علم کا اس بات پر اجماع رہا کہ عقیقہ صرف بچے کا ہو گا۔ انہوں نے اس اجماع کے خلاف جو شاذ فتویٰ دیا، اس کا کوئی اعتبار نہیں کیونکہ اہل علم کے نزدیک اجماعی مسائل میں ابن حزم رحمہ اللہ کے ایسے شاذ نظریات سے اجماع کی حیثیت میں کوئی فرق نہیں پڑتا۔ ہماری اس بات کی تائید کے لیے ملاحظہ فرمائیں:

◈ علامہ احمد بن عبدالرحیم بن حسین المعروف بہ ابن العراقی رحمہ اللہ (م: 826 ھ) لکھتے ہیں:
«ومن تبرع بصدقة عن حمل رجاء حفظه وسلامته، فليس عليه فيه بأس، وقد نقل الاتفاق على عدم الوجوب قبل مخالفة ابن حزم . . . . . . ثم قال والدي رحمه الله: ومع كون ابن حزم قد خالف الإجماع فى وجوبها على الجنين فقد تناقض كلامهٔ . . . . . .»
” جو شخص حفاظت اور سلامتی کی امید سے پیٹ میں موجود بچے کی طرف سے نفلی طور پر صدقہ فطر ادا کر دے تو اس میں کوئی حرج نہیں۔ حافظ ابن حزم رحمہ اللہ کی مخالفت سے پہلے حمل پر صدقہ فطر کے واجب نہ ہونے پر اتفاق منقول ہے . . . . . .۔ پھر میرے والد (حافظ عراقی رحمہ اللہ) نے فرمایا: ابن حزم رحمہ اللہ نے جہاں حمل پر صدقہ فطر کے وجوب کا فتویٰ دے کر اجماع کی مخالفت کی ہے، وہاں ان کی کلام بھی متناقض ہے . . . . .۔“ [طرح التثريب فى شرح التقريب: 61/4]

◈ حافظ ابن حجر رحمہ اللہ (773-852 ھ) لکھتے ہیں:
«ولم يعتبر ابن قدامة مخالفته هذه، فحكي الاجماع . . . . .»
” علامہ ابن قدامہ رحمہ اللہ نے ابن حزم رحمہ اللہ کی مخالفت کا کوئی اعتبار نہیں کیا اور اجماع ہی نقل کیا ہے۔“ [فتح الباري: 529/3]

مانعیں کے دلائل
بڑی عمر میں عقیقہ کے غیر مشروع ہونے کے حوالے سے ایک حدیث تو اس مضمون کے شروع میں ذکر کی جا چکی ہے۔ اس میں عقیقے کا وقت چونکہ ساتواں دن بتایا گیا ہے، لہٰذا اس سے ثابت ہوتا ہے کہ عقیقہ چھوٹی عمر ہی میں کرنا چاہیے۔ مزید وضاحت اس حدیث کے بعد ملاحظہ فرمائیں:

❀ رسول اکرم صلی اللہ علیہ وسلم نے فرمایا:
«من ولد له ولد، فأحب أن ينسك عنهٔ فلينسك، عن الغلام شاتان وعن الجارية شاة»
” جس شخص کے ہاں بچہ پیدا ہو اور وہ اس کی طرف سے عقیقہ کرنا چاہے تو کر لے۔ بچے کی طرف سے دو بکریاں اور بچی کی طرف سے ایک بکری۔“ [سنن ابي داود: 2842، السنن الكبري للبيهقي: 505/9، وسندهٔ حسن]
↰ اس حدیث میں دو مقامات پر یہ بتایا گیا ہے کہ عقیقہ صرف بچے کا ہو گا۔ ” جس کے ہاں بچہ پیدا ہو۔“ کے الفاظ اس بات میں صریح ہیں کہ عقیقے کا وقت بچے کی پیدائش کے قریب قریب ہی ہے اور اس کی وضاحت ساتویں دن کے الفاظ کے ساتھ ہماری ذکر کردہ پہلی حدیث میں موجود ہے۔

➊ سیدنا سلمان رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«مع الغلام عقيقة، فأهريقوا عنه دما، وأميطوا عنه الأذى»
” بچے کے ساتھ عقیقہ ہے، لہٰذا تم اس کی طرف سے خون بہاؤ اور اس کی گندگی دور کرو (یعنی اس کے بال مونڈھو اور ختنہ کرو)۔“ [صحيح البخاري:5471]

↰ اسی حدیث کی بعض روایات میں یہ الفاظ ہیں:
«في الغلام عقيقة/عن الغلام عقيقة»
”بچے کی طرف سے عقیقہ ہے۔“ [مسند احمد: 16238، 16239، سنن النسائي: 4219، السنن الكبري للبيهقي: 298/9]

↰ اس حدیث میں بھی عقیقے کا تعلق بچے ہی کے ساتھ جوڑا گیا ہے اور بچے ہی کی طرف سے جانور ذبح کرنے کی تاکید کی گئی ہے۔ اس حدیث پر امام بخاری رحمہ اللہ کی تبویب بھی اسی طرف اشارہ کرتی ہے کہ یہ بچے کا معاملہ ہے:
«باب إماتة الأذى عن الصبي فى العقيقة.» ” عقیقے میں بچے کے بال مونڈھنے اور ختنہ کرنے کا بیان۔“

◈ شارح بخاری علامہ ابن بطال (م: 449 ھ) اس حدیث کی شرح میں لکھتے ہیں:
«وقوله صلى الله عليه وسلم: ”مع الغلام عقيقتهٔ“ حجة لقول مالك انه لا يعق عن الكبير، وعلي هذا ائمة الفتوي بالامصار»
” نبی اکرم صلی اللہ علیہ وسلم کایہ فرمان کہ بچے کے ساتھ عقیقہ ہے، امام مالک کے اس قول (؟) کی دلیل ہے کہ بڑے کی طرف سے عقیقہ نہیں ہو گا۔ اور اسی بات پر تمام علاقوں کے مفتی ائمہ دین قائم ہیں۔“ [شرح صحيح البخاري:375/5]

◈ علامہ بدر الدین عینی حنفی (م: 855 ھ) نے بھی اس حدیث سے یہی مسئلہ اخذ کیا ہے۔ [عمدة القاري شرح صحيح البخاري: 88/21]

➋ اس حدیث کے راوی صحابی سیدنا سلمان بن عامر ضبی رحمہ اللہ فرماتے ہیں:
«العقيقة مع الولد» ” عقیقہ بچے کے ساتھ ہے۔“ [السنن الكبري للبيهقي: 298/9، وسندهٔ صحيح]

➌ سیدنا عبداللہ بن عمر رضی اللہ عنہما فرمایا کرتے تھے:
«عن الغلام وعن الجارية شاة شاة .»
” بچے اور بچی دونوں کی طرف سے عقیقے میں ایک ایک بکری ذبح کی جائے۔“ [مصنف ابن أبى شيبة: 114/5، وسنده صحيح]

➍ ہشام بن عروہ اپنے والد عروہ بن زبیر تابعی رحمہ اللہ کے بارے بیان کرتے ہیں:
«إنه كان يعق عن الغلام والجارية شاة شاة .»
” آپ بچے اور بچی کی طرف سے ایک ایک بکری عقیقہ کرتے تھے۔“ [ايضا، وسندۂ صحيح]

➎ امام زہری رحمہ اللہ فرمایا کرتے تھے:
«يعق عن الغلام والجارية شاة.»
” بچے اور بچی کی طرف سے ایک ایک بکری عقیقہ کر دی جائے تو کافی ہے۔“ [ايضا: 115/5، و سندهٔ صحيح]

➏ سیدہ عائشہ رضی اللہ عنہا فرمایا کرتی تھیں:
«على الغلام شاتان، وعلٰي الجارية شاة .»
” بچے پر دو بکریاں اور بچی پر ایک بکری عقیقہ کی جائے۔“ [مصنف عبدالرزاق: 328/4، و سندهٔ صحيح]

↰ ان سب احادیث اور تمام آثار میں «غلام» ”بچے“ اور «جارية» ”بچی“ کے الفاظ پکار پکار کر یہی کہہ رہے ہیں کہ عقیقہ صرف بچے کا ہو گا، بڑے کا نہیں کیونکہ «غلام» اور «جارية» کا لفظ چھوٹے بچے کے لیے استعمال ہوتا ہے۔ اس حوالے سے ایک صحیح حدیث کے الفاظ ملاحظہ فرمائیں: «فإنه يغسل بول الجارية، ويرش من بول الغلام»
” بلاشبہ بچی کے پیشاب کو دھویا جائے اور بچے کے پیشاب پر چھینٹے مارے جائیں۔“ [سنن ابي داود: 376، سنن النسائي: 305، سنن ابن ماجه: 526، واللفظ لهٔ وسندهٔ حسن]

↰ جس طرح پیشاب پر چھینٹے مارنے کے حوالے سے «غلام» اور «جارية» یعنی بچے اور بچی میں فرق صرف چھوٹی عمر میں ہی ہوتا ہے، بڑی عمر میں یہ فرق ختم ہو جاتا ہے، اسی طرح عقیقے کے لیے بھی چھوٹی عمر (ساتواں دن) ہی ضروری ہے، بڑی عمر میں عقیقے کا وقت ختم ہو جاتا ہے۔

مجوزین کے دلائل
اب قارئین کرام بڑی عمر میں عقیقے کے جواز کا فتویٰ دینے والے اہل علم کے دلائل ملاحظہ فرمائیں:
↰ اس حدیث کو ذکر کرنے کے بعد مجوزین اہل علم نے لکھا ہے:
↰ آپ صلی اللہ علیہ وسلم کا اپنا عقیقہ کرنا ایک خاص عمل تھا۔ کیسے ہو سکتا ہے کہ بڑی عمر میں عقیقہ امت کے لیے جائز ہو اور پانچویں صدی ہجری کے آغاز تک کوئی ایک بھی اہل علم ایسا نہ ملے جو بڑی عمر میں عقیقے کا قائل و فاعل ہو اور پھر اگر پانچویں صدی میں کوئی ایسا فتویٰ دے بھی دے تو اہل علم اس کا سختی سے رد کرتے ہوئے اسے شذوذ قرار دیں؟ مذکورہ حدیث میں یہ بات کہیں موجود نہیں کہ آپ صلی اللہ علیہ وسلم کا عقیقہ ہوا ہی نہیں تھا یا کسی وجہ سے رہ گیا تھا۔ اگر کوئی یہ کہہ دے کہ زمانہ جاہلیت میں عقیقے کارواج نہ تھا یا اس دور کے عقیقے کو نبی اکرم صلی اللہ علیہ وسلم نے معتبر نہ سمجھا تو صحابہ کرام رضی اللہ عنہم جن میں سے اکثر اسی زمانے میں پیدا ہوئے تھے، انہوں نے اپنا عقیقہ مسلمان ہونے اور فرصت ملنے کے بعد کیوں نہ کیا؟ صحیح بات یہ ہے کہ یہ عمل آپ صلی اللہ علیہ وسلم کے ساتھ خاص تھا۔

◈ حافظ ابن حجر رحمہ اللہ لکھتے ہیں:
«ویحتمل أن يقال: إن صح هذا الخبر كان من خصائصه صلى الله عليه وسلم، كما قالوا فى تضحيته عمن لم یضح من أمته.»
” یہ بھی کہا جا سکتا ہے کہ اگر یہ حدیث صحیح ہے تو یہ آپ صلی اللہ علیہ وسلم کے خصائص میں سے ہے جیسا کہ آپ صلی اللہ علیہ وسلم نے اپنی امت کے قربانی نہ کر سکنے والے لوگوں کی طرف سے قربانی کی تو علمائے کرام نے کہا کہ یہ آپ صلی اللہ علیہ وسلم کے ساتھ خاص ہے۔“ [فتح الباري: 595/9]

◈ حافظ نووی رحمہ اللہ نے بھی یہ احتمال ذکر کرتے ہوئے لکھا ہے:
«اؤ هو من خصائصه صلى الله عليه وسلم، كما ضحي عمن لم يضح من أمته، و قد عدهٔ بغضهم من خصائصه.»
” یا پھر یہ حدیث نبی اکرم صلی اللہ علیہ وسلم کے خصائص میں سے ہے۔ جیسے آپ صلی اللہ علیہ وسلم نے اپنی امت کے نادار لوگوں کی طرف سے قربانی کا خاصہ شمار کیا۔“ [فتح الباري:595/9]
◈ یہی احتمال علامہ عبدالرحمٰن مبارکپوری نے بھی ذکر کیا ہے۔ [تحفة الأحوذي: 97/5]

↰ آئیے ان کے ذکر کردہ اور دیگر آثار سلف کا جائزہ لیتے ہیں:
↰ لیکن اس کی سند حفص بن غیاث کی ” تدلیس“ اور اشعث کے عدم تعین کی بنا پر ”ضعیف“ ہے۔
↰ یہ قول بڑوں کے عقیقے کے سلسلے میں غیر صریح ہونے کے ساتھ ساتھ ”ضعیف“ بھی ہے۔
◈ سلیمان بن طرخان تیمی ”مدلس“ ہیں اور ان کی طرف سے سماع کی تصریح ثابت نہیں۔

↰ امام ابن حزم رحمہ اللہ نے اس روایت کی پوری سند ذکر نہیں کی بلکہ امام وکیع بن جراح سے سلسلہ سند شروع کیا ہے۔ امام وکیع رحمہ اللہ، ابن حزم رحمہ اللہ کے پیدا ہونے سے تقریبا دو صدیاں پہلے دنیا سے رخت سفر باندھ چکے تھے۔ لہٰذا یہ سند سخت منقطع ہے۔ علامہ البانی رحمہ اللہ کا اس کی سند کو ”حسن“ قرار دینا تعجب خیز ہے!

↰ لیکن اس کے راوی طریف بن عیسیٰ عنبری کے حالات معلوم نہیں ہو سکے۔ سوائے امام ابن حبان رحمہ اللہ (الثقات: 327/8) کے کسی نے اس کی توثیق نہیں کی۔ وہ چونکہ مجہول راویوں کی توثیق کر دیتے ہیں، لہٰذا ان کی منفرد توثیق کا کوئی اعتبارنہیں۔ یہ راوی مجہول الحال ہی ہے۔ شاید اس کی سند میں ایک اور علت بھی ہو۔

↰ معلوم ہوا کہ سلف میں سے کوئی بھی بڑی عمر میں عقیقے کی مشروعیت کا قائل و فاعل نہیں تھا۔ صحابہ و تابعین اور ائمہ دین کا اس کام سے رک جانا اس بات کی دلیل ہے کہ یہ نبی اکرم صلی اللہ علیہ وسلم کا خاصہ ہے۔ سلف کا منہج اور محدثین کا طریقہ یہی ہے کہ جب صحابہ و تابعین اور ائمہ دین کسی حدیث پر عمل کرنے سے باز رہیں تو اسے نبی اکرم صلی اللہ علیہ وسلم کا خاصہ قرار دیا جائے جیسا کہ نبی اکرم صلی اللہ علیہ وسلم سے صحابہ کرام کا تبرک لینا ثابت ہے لیکن آپ صلی اللہ علیہ وسلم کے بعد صحابہ و تابعین اور ائمہ دین سے غیر نبی کے بارے میں ایسا کام ثابت نہیں، لہٰذا اہل سنت والجماعت نے تبرکات کو نبی اکرم صلی اللہ علیہ وسلم کے ساتھ خاص سمجھ لیا۔ اسی بارے میں علامہ شاطبی رحمہ اللہ (538-590 ھ) لکھتے ہیں:
«ان الصحابة رضي الله عنهم بعد موته صلى الله عليه وسلم لم يقع من احد منهم شيء من ذلك لم يثبت لواحد منهم من طريق صحيح معروف ان متبركا تبرك به على احد تلك الوجوه او نحوها، بل اقتصروا فيهم على الاقتداء بالأفعال والأقوال والسير التى اتبعوا فيها النبى صلى الله عليه وسلم، فهو إذا إجماع منهم على ترك تلك الأشياء كلها.»
” صحابہ کرام سے آپ صلی اللہ علیہ وسلم کی وفات کے بعد ایسا کوئی کام سرزد نہیں ہوا۔ ان میں سے کسی سے بھی یہ بات ثابت نہیں کہ اس نے اس طرح کوئی تبرک لیا ہو۔ بلکہ وہ اس سلسلے میں صرف آپ صلی اللہ علیہ وسلم کے اقوال و افعال اور سیرت طیبہ سے رہنمائی لینے تک محدود ہو گئے۔ چنانچہ صحابہ کرام کا یہ عمل ان سب تبرکات کو چھوڑ دینے پر اجماع ہے۔“ [الاعتصام: 302,301/2]

↰ ہم بیان کر چکے ہیں کہ یہ حدیث تو ہماری دلیل ہے۔ اس حدیث سے تو معلوم ہوتا ہے کہ عقیقے کا مرہون بچہ ہی ہوتا ہے، بڑا نہیں، لہٰذا جب کوئی شخص بڑا ہو جاتا ہے تو وہ اس رہن سے خود بخود آزاد ہو جاتا ہے۔

پھر مذکورہ عبارت میں ہمارے قابل احترام اہل علم کے قلم نے بھی یہ اعتراف کیا ہے کہ مرہون صرف بچہ ہوتا ہے اور موقع ملنے پر بچے ہی کا عقیقہ کرنا چاہیے۔ ہم بھی یہی کہتے ہیں کہ عقیقہ صرف بچے کا ہو گا، بڑے کا نہیں۔ بچے کے بارے میں بھی ساتویں دن کی قید احادیث سے ثابت ہو چکی ہے۔ بعض اسلاف امت نے جو چودھویں اور اکیسویں دن تک کی رخصت دی ہے تو اس کی وجہ بعض ”ضعیف“ روایات ہیں۔ اسی وجہ سے اکیسویں دن کے بعد عقیقہ کے قائل و فاعل ہونے کی کوئی مثال خیرالقرون کے بہترین عہد میں نہیں ملتی۔

◈ اور یہی وجہ ہے کہ امام ترمذی رحمہ اللہ اس حدیث کو ذکر کرنے کے بعد لکھتے ہیں:
«والعمل على هذا عند أهل العلم، يستحبون أن يذبح عن الغلام العقيقة يوم السابع، فإن لم يتهيا يؤم السابع، فيوم الرابع عشر، فإن لم يتهيا عق عنه يوم حاد و عشرين.»
” اسی حدیث پر اہل علم کا عمل ہے۔ وہ بچے کی طرف سے ساتویں دن جانور ذبح کرنا مستحب سمجھتے ہیں۔ اگر ساتویں دن نہ ہو سکے تو چودھویں دن اور اگر چودھویں دن بھی نہ ہو سکے تو اکیسویں دن۔“ [جامع الترمذي، تحت الحديث: 1522]

↰ یعنی صحابہ و تابعین و ائمہ دین جنہوں نے اس حدیث پر عمل کیا ہے، وہ صرف ساتویں، چودھویں اور اکیسویں دن ہی بچے کے عقیقے کے قائل رہے ہیں۔ امام صاحب کے اس قول سے روز روشن کی طرح یہ بات عیاں ہو رہی ہے کہ ان کے دور تک اکیسویں دن کے بعد عقیقے کا کوئی اہل علم قائل نہ تھا، نیز امام صاحب کے نزدیک حدیث پر عمل کا یہی تقاضا تھا۔ بڑی عمر والوں کے لیے صحابہ و تابعین میں سے کسی نے عقیقہ کرنے کی رخصت نہیں دی۔ ایسا کیوں ہوا؟ صرف اس لیے کہ حدیث میں عقیقے کے سلسلے میں ذکر بچے ہی کا ہے، بڑے کا نہیں۔ «فليتدبر»

↰ بطور یاد دہانی یہ عرض کرتے چلیں کہ جن احادیث سے ہم نے صرف بچے کے لیے عقیقے کا استدلال کیا ہے، ان احادیث سے استدلال کرنے میں ہمیں اولیت حاصل نہیں، بلکہ جیسا کہ ہم نے ذکر کر دیا، امام ترمذی رحمہ اللہ، دیگر ائمہ دین، حافظ ابن بطال اور حافظ ابن عبدالبر وغیرہم کا فہم ہمارے پیش نظر رہا ہے۔ لیکن بڑی عمر میں عقیقے کے مجوزین احادیث سے استدلال کرنے میں اپنا کوئی سلف نہیں رکھتے۔ رہے حافظ ابن حزم اور حافظ ابن القیم رحمها اللہ تو وہ ان کے سلف نہیں بن سکتے۔ ابن حزم اس لیے کہ وہ عقیقے کے وجوب کے قائل ہیں اور اسی وجوب کو دلیل بنا کر انہوں نے عمر کے کسی بھی حصے میں اس کی ادائیگی کا موقف اپنایا، نیز وہ ساتویں دن سے پہلے فوت ہو جانے والے بچے کا عقیقہ بھی واجب سمجھتے ہیں اور ابن القیم اس لیے نہیں کہ وہ عقیقے کے لیے کوئی مدت مقرر سمجھتے ہی نہیں، اسی لیے انہوں نے ساتویں دن سے پہلے بھی عقیقے کو جائز قرار دیا۔ ہمارے قابل قدر اہل علم ان دونوں سے اتفاق نہیں رکھتے، بلکہ وہ عقیقے کے وجوب اور ساتویں دن سے پہلے عقیقے کی رخصت، دونوں باتوں کو شذوذ سمجھتے ہیں۔ پھر اگر وہ اس مسئلے میں ان دونوں حفاظ کو اپنا سلف مان بھی لیں تو ان دونوں اصحاب کی شاذ بات ان کے اپنے سلف، یعنی صحابہ و تابعین اور ائمہ دین کے مقابلے میں زیادہ سے زیادہ بھلا کیا حیثیت رکھے گی؟

↰ معلوم ہوا کہ ہمارے قابل قدر اہل علم کا یہ کہنا درست نہیں کہ: ” اگر کسی عذر کی وجہ سے ساتویں دن عقیقہ کی سنت پر عمل نہ ہو سکے تو پھر جب بھی زندگی میں موقع ملے عقیقہ کر لینا چاہیے اور یہی راجح و صواب ہے۔“ [ماهنامه ضرب حق: شماره 11، ص: 42]

↰ ویسے یہ بات بھی قابل غور ہے کہ بڑی عمر میں عقیقہ کرنے کے لیے عذر کی بنا پر رہنے کی شرط کیوں ہے؟ اگر کسی شخص کے والدین نے بغیر کسی شرعی عذر کے اس کا عقیقہ نہ کیا اور وہ جوان ہو گیا تو کیا اب وہ مرہون نہیں رہا؟ اگر نہیں تو کیوں؟ اگر ہے تو اس شرط کا کیا فائدہ؟

الحاصل: نصوص شرعیہ کی روشنی میں عقیقہ بچپن ہی میں اور ساتویں دن ہی مشروع ہے۔ ہمارے اسلاف صالحین سے یہی منقول ہے۔ اگرچہ بعض سلف نے چند روایات کے مدنظر چودھویں اور اکیسویں دن بھی عقیقے کی رخصت دی ہے لیکن وہ روایات ” ضعیف“ ہونے کی بنا پر ان کا یہ موقف مرجوح ہے۔ رہا بڑی عمر میں عقیقہ تو اس کا سلف میں کوئی قائل و فاعل نہیں رہا۔ اہل حق کا یہی وطیرہ ہے کہ وہ شریعت کی منہح سلف پر تعمیل کرتے ہیں۔ فہم سلف سے ہٹ کر حق کو پانا ممکن نہیں۔ اللہ تعالیٰ ہمیں سلف کے نقش قدم پر ہی زندہ رکھے۔ آمین

تخریج:
«أخرجه أبوداود، الأضاحي، باب في العقيقة، حديث:2838، والترمذي، الأضاحي، حديث:1522، والنسائي، العقيقه، حديث:4225، وابن ماجه، الذبائح، حديث:3165، وأحمد:5 /17.» تشریح:
1. اس حدیث سے معلوم ہوا کہ بچے کی پیدائش کے ساتویں روز بچے کے سر کی پیدائشی آلائش صاف کر کے‘ یعنی اس کے سر کے بال اتروا کر بچے کو نہلایا جائے۔
اس کی طرف سے عقیقہ کیا جائے اور اس کا نام بھی رکھا جائے۔
2. مذکورہ روایت میں ساتویں روز عقیقہ کرنے کا ذکر ہے‘ البتہ اگر ساتویں روز بہ امرمجبوری ممکن نہ ہو تو چودھویں اور اکیسویں دن بھی کیا جا سکتا ہے‘ تاہم افضل یہی ہے کہ ساتویں دن کیا جائے۔
3. نام ساتویں دن رکھنا چاہیے‘ تاہم اس سے پہلے بھی رکھا جا سکتا ہے جیسا کہ رسول اللہ صلی اللہ علیہ وسلم نے بعض بچوں کا نام پہلے دن تجویز فرمایا تھا۔
دیکھیے: (صحیح البخاري‘ العقیقہ‘ حدیث:۵۴۶۷‘ وصحیح مسلم‘ الآداب‘ حدیث:۲۱۴۴)

اردو حاشہ:
(1) ”گروی ہوتا ہے“ جس طرح گروی شدہ چیز کو معاوضہ دے کر چھڑانا ضروری ہوتا ہے، اسی طرح بچے کی آزادی کے لیے عقیقہ کرنا ضروری ہے، البتہ اس بات میں اختلاف ہے کہ ”آزادی“ کا کیا مطلب ہے۔ امام احمد بن حنبل رحمہ اللہ سے منقول ہے کہ گروی شدہ بچہ اگر فوت ہوگیا تو وہ ماں باپ کی سفارش نہیں کرے گا کیونکہ گروی شدہ چیز سے مالک فائدہ نہیں اٹھا سکتا۔ اسے چھڑانے کے بعد ہی فائدہ حاصل کرسکتا ہے جبکہ حافظ ابن قیم رحمہ اللہ نے شیطان کے چنگل سے چھڑانا مراد لیا ہے۔
(2) ”ساتویں دن“ گویا اس سے پہلے عقیقہ نہیں ہوسکتا۔ بالفرض اگر ساتویں دن عقیقہ نہ ہوسکے تو امام مالک کا خیال ہے کہ بعد میں نہیں کرنا چاہیے کیونکہ اس کا وقت گزر گیا، جیسے قربانی کا وقت گزر جائے بعد میں قربانی نہیں کی جاسکتی۔ دیگر ائمہ کا خیال ہے کہ اگر ساتویں دن عقیقہ نہ ہوسکے تو اگلے ساتویں دن، یعنی چودھویں دن عقیقہ کیا جائے۔ اگر اس دن بھی عقیقہ نہ ہو سکے تو اکیسویں دن عقیقہ کیا جائے۔ اس مفہوم کی ایک مرفوع حدیث بیہقی میں آتی ہے مگر اس کا راوی ضعیف ہے۔ اسی طرح حضرت عائشہ ؓ کا قول بھی اسی مفہوم کے ساتھ مستدرک حاکم میں آتا ہے، لیکن وہ بھی انقطاع کی وجہ سے ضعیف ہے تفصیل کے لیے دیکھیے:(الإرواء، حديث:1170)  اس لیے سنت ساتویں دن ہی ہے، تاہم اگر اس روز ممکن نہ ہوتو بعد میں کسی روز بھی کیا جاسکتا ہے۔ اس کا حکم بھی قربانی والا ہوگا، یعنی اس سے سب کھا سکتے ہیں۔ گھر والے بھی اور دوسرے بھی۔ امیر بھی اور فقیر بھی۔
(3) ”نام رکھا جائے“ ساتویں دن نام رکھنا مستحب ہے‘ البتہ ساتویں دن سے پہلے اور بعد میں بھی رکھا جاسکتا ہے۔
(4) اگر بچہ ساتویں دن سے پہلے ہی فوت ہو جائے ظاہربات یہی ہے کہ اس کا عقیقہ کرنے کی ضرورت نہیں کیونکہ وہ عقیقے کے وقت تک زندہ نہیں رہا۔

فوائد ومسائل:
بچے کے گروی ہونے کا مفہوم بقول امام احمد یہ ہے۔
کہ بچے کا اگر عقیقہ نہ کیا جائے۔
تو وہ اپنے ماں باپ کی شفاعت نہیں کرسکے گا۔
یہ بھی کہا گیا ہے کہ یہ عقیقہ کے واجب ہونے کے مفہوم میں ہے۔
جیسے کہ قرض وغیرہ کی صورت میں ادایئگی کیے بغیر گروی چیز واپس نہیں ہوسکتی۔
اور یہ بھی کہا گیا ہے کہ بچہ اپنے بالوں اور میل کچیل کے ساتھ گروی ہوتا ہے۔
یعنی ان کا ازالہ کرنا چاہیے۔
(عون المعبود)

اردو حاشہ:
فوائد و مسائل:
(1)
گروی رکھنے کا مطلب یہ ہے کہ جس طرح گروی چیز حاصل کرنے کے لیے قرض ادا کرنا ضروری ہوتا ہے، اسی طرح بچے سے پوری طرح برکت اور فائدے کا حصول اسی وقت ہوتا ہے جب اس کا عقیقہ کردیا گیا ہو۔

(2)
عقیقہ ساتویں دن کیا جاتا ہے۔
اگر ساتویں دن ممکن نہ ہوتو چودھویں یا اکیسویں دن بھی کیا جاسکتا ہے۔
سنن بیہیقی کی ایک روایت میں یہ مسئلہ مذکور ہے۔ دیکھیے: (السنن الكبرٰي للبهيقي، الضحاية، باب ما جاء في وقت العقيقة: 9/ 303)
یہ روایت اگرچہ ضعیف ہے لیکن اس کی تائید ام المومنین حضرت عائشہ رضی اللہ عنہا کے ایک فتوے سے ہوتی ہے۔ (مستدرك الحاكم، الذبائح، حديث: 7595)
غالباً اسی وجہ سے شیخ البانی ؒ نےاس کو صحیح الجامع الصغیر میں درج کیا ہے، اس لیے مجبوری کی صورت میں اس مطابق عمل کیا جاسکتا ہے، تاہم افضل یہی ہے کہ ساتوین دن عقیقہ کیا جائے۔

(3)
بچے کے سر کے بال مونڈ کران کے وزن کے برابر چاندی صدقہ کرنی چاہیے، یا اتنی چاندی کی قیمت صدقہ کردی جائے۔
جامع الترمذی میں ایک حدیث میں مذکور ہے کہ نبی اکرمﷺ نے حضرت فاطمہ رضی اللہ عنہا کو حضرت حسن رضی اللہ عنہ کی ولادت کے موقع پر حکم دیا تھا کہ ان کے سر کے بال اتار کر ان کے وزن کے برابر چاندی صدقہ کریں۔ (جامع الترمذي، الأضاحي، باب العقيقة بشاة، حديث: 1519)
اس کی سند اگرچہ ضعیف ہے لیکن متعدد اسناد سے روایت کی وجہ سے اسے حسن (قابل اعتماد)
قراردیا گیا ہے۔ دیکھیے: (إرواء الغلیل: 4/ 402، 406)

(4)
نام ساتویں دن رکھنا چاہیے، تاہم اس سے پہلے بھی رکھا جاسکتا ہے، رسول اللہ ﷺنے بعض بچوں کا نام پہلے دن ہی تجویز فرمایا ہے۔
حضرت ابو موسی اشعری رضی اللہ عنہ سے روایت ہے، انھوں نے فرمایا:
میرے ہاں بیٹا پیدا ہوا تو میں اسے لیکر نبی ﷺ کی خدمت میں حاضر ہوا آپﷺ نے اس کا نام ابراہیم رکھا، اور کھجور کی گھٹی دی۔ (صحيح البخاري، العقيقة، باب تسمية المولود غداة يولد لمن لم يعق عنه، وتحنيكه، حديث: 5467، وصحيح مسلم، الآداب، باب استحباب تحنيك المولود عنه ولادته۔
۔
۔
۔
۔
۔
وجواز تسمية يوم ولادته۔
۔
۔
۔
، حديث: 2144)
ظاہر ہے گھٹی پہلے دن ہی دی جاتی ہے۔

اردو حاشہ:
وضاحت:
1؎:
”مرتهن“ کے مفہوم میں اختلاف ہے:
سب سے عمدہ بات وہ ہے جوامام احمد بن حنبل رحمہ اللہ نے فرمائی ہے کہ یہ شفاعت کے متعلق ہے،
یعنی جب بچہ مرجائے اور اس کا عقیقہ نہ کیا گیا ہو تو قیامت کے دن وہ اپنے والدین کے حق میں شفاعت نہیں کرسکے گا،
ایک قول یہ ہے کہ عقیقہ ضروری اور لازمی ہے اس کے بغیر چارہ کار نہیں،
ایک قول یہ بھی ہے کہ وہ اپنے بالوں کی گندگی وناپاکی میں مرہون ہے،
اسی لیے حدیث میں آیا ہے کہ اس سے گندگی کو دور کرو۔