فوائد ومسائل:
اس روایت میں دن کا ذکر اور روزہ بھی رکھو کا بیان صحیح نہیں ہے۔
کیونکہ یہ روایت صحیح بخاری میں ہے، اس میں دن کا اور روزہ رکھنے کے حکم کا ذکر نہیں ہے۔
(صحيح البخاري‘ الاعتكاف‘ حديث: 2033) بہرحال نیکی کے کام کی نذر خواہ جاہلیت کے دور میں مانی گئی ہو، پوری کرنی چاہیے۔

تخریج:
«أخرجه البخاري، الاعتكاف، باب الاعتكاف ليلًا، حديث:2032، ومسلم، الأيمان، باب نذر الكافر وما يفعل فيه إذا أسلم، حديث:1656.» تشریح:
اس حدیث سے معلوم ہوا کہ کافر نے حالت کفر میں جو نذر مانی ہو‘ اسلام لانے کے بعد اسے پورا کرنا ضروری ہے بشرطیکہ غیر شرعی نہ ہو۔
امام بخاری‘ امام ابن جریر رحمہم اللہ اور شوافع کی ایک جماعت کی رائے یہی ہے مگر جمہور کے نزدیک کافر کی نذر منعقد ہی نہیں ہوتی تو پوری کرنے کا کیا سوال‘ اس لیے انھوں نے اس حدیث کو استحباب پر محمول کیا ہے۔
بہرحال حدیث کے ظاہر سے پہلی رائے کی تائید ہوتی ہے۔
واللّٰہ أعلم۔

اردو حاشہ:
یہ نذر نیکی کی تھی‘ اس لیے آپ نے اسے پورا کرنے کا حکم فرمایا ورنہ کفر کے دوران میں احکام واجب نہیں ہوتے۔

اردو حاشہ:
ایسی نذر جو کفر کی حالت میں مانی ہو اور اس میں اللہ تعالیٰ کی اطاعت ہو تو اسلام قبول کرنے کے بعد بھی وہ نذر پوری کی جائے گی۔

فوائد ومسائل:
حق بات کی نذر اگرحالت کفر میں بھی مانی ہو تو اسے پورا کرنا ضروری ہے۔

اردو حاشہ:
فوائد  وم مسائل:

(1)
اعتکاف ایک دن یا ایک رات بھی ہو سکتا ہے۔

(2)
اگر کوئی شخص اسلام قبول کرنے سے پہلے کسی نیک کام کا ارادہ کرے تو اسلام قبول کرنے کے بعد وہ کام کر لینا چاہیے البتہ اگر کسی غیر شرعی کام کا ارادہ کیا ہو تو اسے پورا نہیں کرنا چاہیے۔

(3)
اللہ کے لئے نذر ماننا عبادت ہے لہٰذا ایسی نذر پوری کرنا ضروری ہے۔

اردو حاشہ:
فوائد و مسائل:
(1)
  نذر چونکہ اللہ کی عبادت ہے اور نیکی ہے اس لیے اسلام قبول کرنے سے پہلے جو نیکی کرنے کا ارادہ کیا تھا نبی اکرمﷺ نے وہ نیکی کرنے کا حکم دیا۔

(2)
  حالت کفر میں اگر ایسا کام کرنے کی نذر مانی جائے جو اسلام میں بھی نیکی ہے تو اسلام قبول کرنے کے بعد نذر پوری کرنا ضروری ہے۔

اردو حاشہ:
وضاحت:
1؎:
چنانچہ عمر رضی اللہ عنہ نے ایک رات کے لیے مسجد حرام میں اعتکاف کیا۔

حدیث حاشیہ:
فوائد ومسائل:
فتح مکہ کے بعد حضور اکرم صلی اللہ علیہ وسلم نے بنو ہوازن سے جنگ حنین شوال 8ھ میں لڑی،
شکست کھانے کے بعد دشمن تتر بتر ہو گیا،
ایک گروہ نے طائف کا رخ کیا،
دوسرا گروہ اوطاس کی طرف چلا گیا،
اور تیسرا گروہ نخلہ کی طرف بھاگ گیا،
آپ صلی اللہ علیہ وسلم نے دشمن کے بیوی بچوں کو جن کی تعداد چھ ہزار تھی،
قیدی بنا لیا،
مویشیوں میں چوبیس ہزار اونٹ اور چالیس ہزار سے زائد بکریاں قبضہ میں لے لیں،
اور چار ہزار اوقیہ چاندی ہاتھ لگی،
ان تمام اشیاء کو جعرانہ مقام میں جمع کیا گیا،
اور آپﷺ نے طائف کا رخ کیا،
کیونکہ دشمن کا بڑا گروہ ادھر ہی گیا تھا،
لیکن کچھ عرصہ محاصرہ کرنے کے بعد آپ واپس آ گئے،
اور جعرانہ میں آپﷺ نے بنو ہوازن کا رشتہ داری کی وجہ سے کیونکہ دائی حلیمہ اس قوم کے ایک خاندان سے تعلق رکھتی تھیں،
دو ہفتہ سے زائد انتظار کیا کہ وہ مسلمان ہو جائیں،
اور اپنا مال و دولت اور قیدی واپس لے جائیں،
لیکن جب وہ اس انتظار کے عرصہ میں نہ آئے تو آپ نے مال اور قیدی مسلمانوں میں تقسیم فرما دئیے،
غنیمت کی تقسیم کے بعد،
بنو ہوازن کا وفد مسلمان ہو کر آپ صلی اللہ علیہ وسلم کی خدمت میں حاضر ہوا،
اور انتہائی موثر انداز میں اپنے قیدی اور مال واپس لینے کی درخواست کی،
آپﷺ نے فرمایا،
غنیمت کی تقسیم کے بعد قیدی اور مال دونوں کی واپسی ممکن نہیں ہے،
ایک چیز لے لو،
انہوں نے قیدیوں کی واپسی کی خواہش کی تو آپﷺ نے تمام صحابہ کو جمع کر کے اس سلسلہ میں خطبہ ارشاد فرمایا،
جس کے نتیجہ میں لوگ قیدی چھوڑنے پر آمادہ ہو گئے،
تو آپﷺ نے تمام قیدیوں کو آزاد کر دیا،
حضور اکرم صلی اللہ علیہ وسلم نے حضرت عمر رضی اللہ عنہ کو غنیمت کے خمس سے دو لونڈیاں دی تھیں،
انہوں نے ایک اپنے بیٹے ابن عمر کو دے دی اور دوسری اپنے پاس رکھی،
جب آپﷺ نے قیدیوں کی آزادی کا اعلان فرمایا،
تو دونوں باپ بیٹا نے اپنی اپنی لونڈی کو آزاد کر دیا۔
(تفصیل کے لیے دیکھیے الرحیق المختوم)

حدیث حاشیہ:
نذر نیاز جوخالصاً للہ ہو اور امر جائز کے لیے جائز طور پر مانی گئی ہو اور اس کا پورا کرنا واجب ہے۔
اعتکاف بھی ایسے امور میں داخل ہے اگر کوئی غلط نذر مانے جیسا کہ ایک شخص نے پیدل چل کر حج کرنے کی نذ رمانی تھی۔
آپ ﷺ نے اسے باطل قرار دیا۔
اس طرح دیگر غلط نذر منت بھی توڑی جانی ضروری ہے۔
غیر اللہ کے لیے کوئی نذر منت ماننا شرک میں داخل ہے۔

حدیث حاشیہ:
حضرت نافع بن سمر جلیس حضرت عبد اللہ بن عمر ؓ کے آزاد کردہ ہیں۔
حدیث کے فن میں سند اور حجت ہیں۔
امام مالک فرماتے ہیں کہ جب بھی میں نافع سے ابن عمرؓ کی حدیث سن لیتا ہوں تو پھر کسی اور راوی سے سننے کی مجھے ضرورت نہیں رہتی۔
118 ھ میں وفات پائی۔

حدیث حاشیہ:
(1)
صحیح بخاری کی اس روایت سے بعض علماء نے استدلال کیا ہے کہ اعتکاف روزے کے بغیر صحیح ہے کیونکہ رات روزے کا محل نہیں۔
اگر روزہ شرط ہوتا تو رسول اللہ ﷺ حضرت عمر ؓ کو حکم دیتے کہ روزہ رکھ کر اعتکاف کریں، لیکن اس روایت سے صرف رات کے وقت اعتکاف کرنے کا استدلال محل نظر ہے کیونکہ صحیح مسلم میں ہے کہ حضرت عمر ؓ نے ایک دن کے اعتکاف کی نذر مانی تھی۔
(صحیح مسلم، الإیمان، حدیث: 4294(1656)
ابن حبان نے کہا ہے:
دونوں روایات صحیح ہیں کیونکہ حضرت عمر ؓ نے ایک دن اور ایک رات کا اعتکاف کرنے کی نذر مانی تھی۔
جس نے رات کا ذکر کیا اس نے ضمناً دن کا ارادہ کیا ہے اور جس نے صرف دن کا ذکر کیا ہے اس کے ذہن میں رات کا ذکر ہے کیونکہ رات دن کے تابع ہوتی ہے۔
(2)
بعض روایات میں ہے کہ حضرت عمر فاروق ؓ نے جب رسول اللہ ﷺ سے عرض کی کہ ان پر اعتکاف ہے تو آپ نے انہیں حکم دیا کہ اعتکاف کریں اور روزہ رکھیں۔
لیکن یہ روایت عبداللہ بن بدیل راوی کی وجہ سے قابل استدلال نہیں۔
(فتح الباري: 349/4)
البتہ صحیح بخاری کی ایک روایت میں ہے کہ حضرت عمر ؓ نے رسول اللہ ﷺ کی ہدایت کے بعد مسجد حرام میں ایک رات کا اعتکاف کیا تھا۔
(صحیح البخاري، الاعتکاف، حدیث: 2042)
اس سے معلوم ہوتا ہے کہ انہوں نے ایک رات سے زیادہ اعتکاف نہیں کیا اور اس اعتکاف میں روزہ بھی نہیں تھا۔
(فتح الباري: 349/4)

حدیث حاشیہ:
(1)
اس حدیث سے معلوم ہوا کہ اعتکاف کے لیے روزہ شرط نہیں کیونکہ رسول اللہ ﷺ نے حضرت عمر ؓ کو ایک رات کا اعتکاف کرنے کی اجازت دی اور رات روزے کا محل نہیں، البتہ بعض روایات میں ہے کہ رسول اللہ ﷺ نے انہیں حکم دیا تھا کہ اعتکاف کریں اور روزہ رکھیں لیکن یہ روایات قابل حجت نہیں ہیں کیونکہ ان میں عبداللہ بن بدیل نامی ایک راوی ضعیف ہے۔
(فتح الباري: 349/4)
اس روایت سے پتہ چلتا ہے کہ حضرت عمر فاروق ؓ نے صرف ایک رات کا اعتکاف کیا۔
رات کا روزہ شریعت میں منع ہے۔
(2)
بعض حضرات کا خیال ہے کہ یہ واقعہ اس وقت پیش آیا جب رات کا روزہ منع نہیں تھا۔
لیکن یہ موقف اس لیے غلط ہے کہ حضرت عمر ؓ نے غزوۂ حنین سے لوٹتے وقت آپ سے عرض کی تھی اور اس وقت رات کے روزے کی ممانعت آ چکی تھی۔
(فتح الباري: 348/4)
البتہ حضرت عائشہ ؓ سے ایک روایت ہے کہ روزے کے بغیر اعتکاف نہیں ہے۔
(سنن أبي داود، الصیام، حدیث: 2473) (3)
ہمارے نزدیک راجح موقف یہ ہے کہ روزے کے بغیر اعتکاف جائز ہے لیکن روزے کے ساتھ اعتکاف کرنا افضل ہے۔
یاد رہے! اس کا یہ مطلب نہیں کہ کوئی شخص رمضان کا روزہ تو استطاعت کے باوجود نہ رکھے اور اعتکاف کر لے بلکہ اس کا مطلب یہ ہے کہ جو شخص رمضان کے علاوہ اعتکاف کرتا ہے یا رمضان میں روزے کی ہمت نہیں رکھتا تو اس کے لیے جائز ہے۔

حدیث حاشیہ:
(1)
بعض حضرات کا خیال ہے کہ حضرت عمر ؓ نے اسلام لانے کے بعد فتح مکہ سے پہلے نذر مانی تھی، لیکن یہ خیال مبنی بر حقیقت نہیں کیونکہ صحیح مسلم میں ہے کہ جب میں مسلمان ہوا تو رسول اللہ ﷺ سے اس کے متعلق سوال کیا بلکہ سنن دارقطنی کی روایت میں صراحت ہے کہ حضرت عمر ؓ نے شرک کے زمانے میں اعتکاف کرنے کی نذر مانی تھی۔
(فتح الباري: 348/4) (2)
امام بخاری ؒ نے اس حدیث پر ایک عنوان بایں الفاظ قائم کیا ہے:
(باب:
إذا نذر أو حلف أن لا يكلم إنساناً في الجاهيلة ثم أسلم)
”جب انسان دور جاہلیت میں نذر مانے یا کسی سے کلام نہ کرنے کی قسم اٹھائے، پھر مسلمان ہو جائے۔
“ (صحیح البخاري، الإیمان والنذور، باب: 29) (3)
حافظ ابن حجر ؒ لکھتے ہیں:
نذر اور قسم دور جاہلیت میں بھی منعقد ہو جاتی ہے یہاں تک کہ اسلام لانے کے بعد اسے پورا کرنا ضروری ہوتا ہے کیونکہ رسول اللہ ﷺ نے حضرت عمر ؓ کو دور جاہلیت کی نذر پوری کرنے کا حکم دیا اور حضرت عمر نے اس نذر کے مطابق عمل کیا۔
اس کے متعلقہ مباحث "کتاب الایمان والنذور" میں بیان ہوں گی۔
(فتح الباري: 361/4)
بإذن اللہ

حدیث حاشیہ:
1۔
رسول اللہ ﷺ نے جعرانہ سے عمرے کا احرام باندھا تو حضرت عمر ؓ کو بھی اپنی دور جاہلیت کی نذر کا خیال آیا تو اس کے متعلق سوال کیا چنانچہ اس کی تفصیل درج ذیل روایت میں ہے۔
حضرت ابن عمر ؓ سے روایت ہے کہ جب رسول اللہ ﷺ طائف سے واپس جعرانہ آئے تو حضرت عمر ؓ نے عرض کی:
اللہ کے رسول اللہ ﷺ! میں نے دور جاہلیت میں نذر مانی تھی کہ مسجد حرام میں ایک دن کا اعتکاف کروں گا، اس کے متعلق کیا حکم ہے؟ رسول اللہ ﷺ نے فرمایا:
"جائیں اور ایک دن مسجد احرام میں اعتکاف کرلیں۔
" حضرت ابن عمر ؓ نے مزید فرمایا:
رسول اللہ ﷺ نے خمس سے حضرت عمر ؓ کو ایک لونڈی دی تھی جب رسول اللہ ﷺ نے لوگوں کو آزاد کردیا تو حضرت عمر ؓ نے ان کا شور و غل سنا کہہ رہے تھے کہ رسول اللہ ﷺ نے ہمیں آزاد کردیا ہے حضرت عمر ؓ نے ابن عمر ؓ سے فرمایا:
جاؤ اور اس لونڈی کو بھی آزاد کردو۔
(صحیح مسلم، الإیمان، حدیث: 4294۔
(1656)
حافظ ابن حجر ؒ لکھتے ہیں۔
کہ اس حدیث سے پتہ چلتا ہے کہ امام بخاری ؒ نے کس بنا پر مذکورہ حدیث کو غزوہ حنین میں بیان کیا ہے کیونکہ اس میں غزوہ حنین سے ملنے والی ایک لونڈی کا ذکر ہے جسے عمر فاروق ؒ نے آزاد کردیا تھا واللہ اعلم۔
(فتح الباري: 45/8)

حدیث حاشیہ:
(1)
اس حدیث میں جاہلیت سے مراد حضرت عمر رضی اللہ عنہ کے اسلام لانے سے پہلے کا زمانہ ہے کیونکہ ہر شخص کی جاہلیت اس کے اسلام کے اعتبار سے ہے۔
بعثت رسول اللہ صلی اللہ علیہ وسلم سے پہلے کا زمانۂ جاہلیت مراد نہیں ہے۔
امام طحاوی رحمہ اللہ نے اس حدیث پر ان الفاظ میں عنوان قائم کیا ہے:
(من نذر وهو مشرك ثم اسلم)
”جس نے بحالت شرک نذر مانی پھر مسلمان ہو گیا۔
“ یہ عنوان مقصد کے ادا کرنے میں زیادہ واضح ہے۔
غزوۂ حنین سے واپس ہوتے ہوئے حضرت عمر رضی اللہ عنہ نے رسول اللہ صلی اللہ علیہ وسلم سے مذکورہ سوال کیا تھا جیسا کہ ایک حدیث میں اس کی صراحت ہے۔
(صحیح البخاري، المغازي، حدیث: 4320) (2)
اس حدیث سے معلوم ہوا کہ زمانۂ جاہلیت کی نذر کو پورا کرنا ضروری ہے۔
زمانۂ کفروشرک نذر پوری کرنے میں رکاوٹ نہیں بنتا۔
بہرحال نذر طاعت کا پورا کرنا ضروری ہے، خواہ وہ زمانۂ کفروشرک ہی میں کیوں نہ مانی گئی ہو۔
(3)
واضح رہے کہ حضرت عمر رضی اللہ عنہ غزوۂ حنین میں حاصل ہونے والی غنیمتوں کی تقسیم کے بعد مسجد حرام میں اعتکاف بیٹھے تھے جیسا کہ انہوں نے اس امر کی وضاحت کی ہے۔
(فتح الباري: 709/11)