797۔ اردو حاشیہ:
➊ مقصد یہ ہے کہ جو قرأت جہری تھی، ہم جہری کرتے ہیں اور جو سری تھی ہم بھی سری کرتے ہیں۔
➋ امت کا اجماع ہے کہ فجر، مغرب، عشاء (پہلی دو رکعتیں) جمعہ، عید اور استسقاء میں قرأت جہری ہوتی ہے اور ظہر، عصر اور مغرب کی تیسری اور عشاء کی آخری دونوں رکعتوں میں سری۔
➌ صحابہ کرام رضوان اللہ عنہم اجمعین امت کا وہ پہلا عظیم طبقہ ہے، جس نے دین کو رسول اللہ صلی اللہ علیہ وسلم سے حاصل کیا اور ان سے بعد کے لوگوں نے ان سے حاصل کیا۔

820۔ اردو حاشیہ:
مذکورہ روایات سنداً ضعیف ہیں۔ لیکن اس میں بیان کردہ باتیں دوسری روایات سے ثابت ہیں۔ یعنی منفرد شخص کے لئے سورت فاتحہ کے ساتھ دوسری سورت یا قرآن سے کچھ حصہ پڑھنے کا حکم ہے۔ لیکن جہری نمازوں میں امام کے پیچھے سورہ فاتحہ کے علاوہ کچھ نہ پڑھا جائے۔

821۔ اردو حاشیہ:
➊ سورہ فاتحہ کے بغیر نماز بالکل ناقص اور ناتمام رہتی ہے، جس کی تعبیر دوسری احادیث میں کچھ یوں ہے:
«لا صلوة لمن لم يقرا بفاتحة الكتاب» [صحيح بخاري۔ حديث 756۔ وصحيح مسلم۔ حديث 394]
اسماعیلی کی روایت میں جناب سفیان سے مروی ہے:
«لا تجزي صلوة لايقرا فيها بفاتحة الكتاب» [سنن دار قطني۔ حديث 1212]
”جس نماز میں سورت فاتحہ نہ پڑھی جائے وہ کافی نہیں ہوتی“
فتح الباری، ابن خذیمہ، ابن حبان اور احمد میں ہے:
«لا تقبل صلوة لا يقرا فيها بام القران» (فتح الباری۔ شرح حدیث 756)
جس نماز میں ام القرآن فاتحہ نہ پڑھی جائے، وہ قبول نہیں ہوتی، اس قسم کے مختلف الفاظ ثابت کرتے ہیں کہ سورہ فاتحہ نماز کا رکن ہے۔ اس کا پڑھنا فرض اور واجب ہے۔ الا یہ کہ کوئی پڑھنے سے عاجز ہو۔
➋ اس حکم میں تمام قسم کی نمازیں (فرض، نفل، جنازہ، عید اور کسوف وغیرہ) اور تمام طرح کے نمازی (منفرد، امام، مقتدی، حاضر اور مسافر) شامل ہیں۔
➌ نفس میں پڑھنا اس سے مراد آواز نکالے بغیر زبان سے پڑھنا ہے، صرف ان الفاظ کا خیال اور تصور صحیح نہیں، اسے کسی طرح قراءت (پڑھنا) نہیں کہا جاتا۔ نیز یہ مسئلہ حضرت ابوہریرہ رضی اللہ عنہ کا مذہب اور رائے محض نہیں۔ بلکہ ان کا استدلال صریح اور صحیح فرمان نبوی سے ہے۔
➍ سورہ فاتحہ کو نماز سے تعبیر کرتے ہوئے صرف اسی کی تقسیم کی گئی ہے اور اس تقسیم میں بسم اللہ کو شمار نہیں کیا گیا ہے۔ یہ دلیل ہے کہ بسم اللہ سورۃ فاتحہ کا جزو نہیں ہے۔
➎ امام کے پیچھے ہونے کا اشکال آج کا نیا اشکال نہیں ہے بلکہ تابعین کے دور سے ہے، مگر حضرت ابوہریرہ رضی اللہ عنہ نے اس کے پڑھنے کا فتویٰ اور اس کی دلیل پیش فرما کر تمام اوہام کا ازالہ فرما دیا ہے۔
نیز آیت کریمہ:
«وَإِذَا قُرِئَ الْقُرْآنُ فَاسْتَمِعُوا لَهُ وَأَنصِتُوا» [اعراف۔ 104]
”جب قرآن پڑھا جائے تو خاموشی سے سنو“ کا مفہوم بھی واضح کر دیا کہ آہستہ سے پڑھو یعنی آواز نہ نکاؤ، اس میں انصات بھی ہے اور قرأت پر عمل بھی، نیز حضرت عبادہ رضی اللہ عنہ کی حدیث میں ہے کہ رسول اللہ صلی اللہ علیہ وسلم نے فرمایا: «لا تفعلوا الا بام القران» یعنی ”امام کے پیچھے سورۃ فاتحہ کی قرأت کرو۔“
➏ سورۃ فاتحہ نماز کی سب رکعات میں پڑھی جائے، جیسا کہ حضرت خلاد بن رافع رضی اللہ عنہ کی حدیث «مسئي الصلواة» میں آیا کہ «ثم افعل ذلك فى صلوتك كلها» ”اور پوری نماز میں ایسا ہی کرو۔“ [صحيح بخاري۔ حديث 793وصحيح مسلم حديث 397]

971 ۔ اردو حاشیہ:
➊ اشارہ ہے کہ نماز ظہر اور عصر میں آہستہ قرأت ہے۔ یہ نہیں کہ ان میں قرأت ہے ہی نہیں جیسا کہ بعض لوگوں کو غلط فہمی ہوئی ہے۔ دن کی نمازوں میں آہستہ قرأت کا راز شاید یہ ہے کہ دن میں شور و غل ہوتا ہے، جماعت بڑی ہو تو سماع مشکل ہو گا، جب کہ رات میں سکون ہوتا ہے، اس لیے رات کی نازوں میں قرأت بلند آواز سے ہوتی ہے۔ جس نماز میں زیادہ سکون ہوتا ہے، اس میں قرأت بھی طویل رکھی گئی ہے۔ واللہ أعلم۔
➋ حدیث کا یہ مطلب بھی ہو سکتا ہے کہ ہر رکعت میں قرأت ہے اگرچہ پہلی دو میں قرأت اونچی کی جاتی ہے اور آخری رکعتوں میں آہستہ تاکہ نماز یادہ لمبی نہ ہو جائے۔

اردو حاشہ:
فوائد و مسائل:
(1)
اس سے معلوم ہوتا ہے کہ سورہ فاتحہ نماز کارکن ہے۔
مقتدی اور اکیلے دونوں پر فرض ہے۔
کہ سورۃ فاتحہ پڑھیں۔

(2)
نقص دو طرح کا ہوتا ہے۔
مثلا ایک انسان کا بازو یا پاؤں کٹ جائے تو انسان زندہ رہ سکتاہے۔
اگرچہ وہ ناقص ہوگا۔
لیکن اگر کسی کا سر کاٹ دیا جائے۔
یا دل نکال دیا جائے تو وہ زندہ نہیں رہ سکتا۔
سورہ فاتحہ نہ پڑھنے سے ہونے واے نقص کو عام طور پر پہلی قسم کا نقص قرار دیا جاتا ہے۔
لیکن یہ قول درست نہیں کیونکہ مرفوع حدیث سے ثابت ہے کہ سورہ فاتحہ کے بغیر نماز نہیں ہوتی۔
حضرت ابو ہریرہ رضی اللہ تعالیٰ عنہ سے روایت ہے رسو ل اللہ ﷺ نے فرمایا۔ (لَاتَجْزِي صَلَاةٌ لَايُقْرَاءُ فِيْهَا بِفَاتِحَةِ الْكِتَابِ)
”جس نماز میں سورہ فاتحہ نہ پڑھی جائے۔
وہ کفایت نہیں کرتی۔“
 (صحیح ابن خذیمة، الصلاۃ، جماع أبواب الأذان والإقامة، با ب الذکر الدلیل علی أن الخداج۔
۔
۔
ھو النقص الذی لاتجزیٔ الصلواۃ معه، حدیث: 490)
 کفایت نہ کرنے کا مطلب یہ ہے کہ ایسی پڑھی ہوئی نماز کافی نہیں دوبارہ پڑھنے پڑے گی۔

(3) (پڑھنا) (إِقْرَاء بِهَا فِي نَفْسِكَ)
دل میں پڑھ لے۔
اس کا مطلب زبان کو حرکت دیے بغیر دل میں سوچنا نہیں۔
کیونکہ اسے قراءت (پڑھنا)
نہیں کہا جاتا۔
بلکہ اس طرح پڑھنا مراد ہے۔
کہ ساتھ کھڑا ہوا نمازی آواز نہ سنے۔
اس طرح پڑھنا استماع اور انصات کے خلاف بھی نہیں ہے۔
جیسا کہ قراۃ فاتحہ خلف الامام کو استماع اور انصات کے خلاف باور کرا کے اس حکم نبویﷺسے انکار کیا جاتا ہے۔

فائدہ:
اس حدیث سے سورۃ الفاتحہ کی زبردست فضیلت ثابت ہوتی ہے، جب بھی کوئی اس سورہ کو نماز میں پڑھتا ہے تو اللہ تعالیٰ ہر ہر آیت کا جواب دیتے ہیں۔ اس سورت میں پہلی تین آیات اور «اياك نعبد» تک اللہ تعالیٰ کی تعریف ہے، اس کے بعد «اياك نستعين» سے لے کر «ولا الضالين» تک اللہ تعالیٰ سے مختلف چیز میں مانگی جاتی ہیں۔
اس سے ثابت ہوا کہ جب بھی دعا کی جائے پہلے اللہ تعالیٰ کی تعریف کرنی چاہیے، اس کے بعد جو ضرورت ہو وہ پیش کرنی چاہیے۔
یہاں بطور تنبیہ عرض ہے کہ اللہ تعالیٰ اس کا جواب دیتے ہیں جو سورہ فاتحہ خود پڑھتا ہے، صرف سننے والے کو اللہ تعالیٰ جواب نہیں دیتے، اس سے بھی ہر نماز میں سورہ فاتحہ کا امام کے پیچھے پڑھنا ثابت ہوتا ہے۔

فائدہ:
اس حدیث میں بھی واضح ثبوت ہے کہ امام کی نماز اپنی ہوتی ہے، اور مقتدی کی نماز اپنی۔ اگر امام نماز میں سورہ فاتحہ پڑھے گا تو اس کی نماز مکمل ہو گی، اسی طرح جب مقتدی نماز میں سورہ فاتحہ پڑھے گا تو اس کی نماز مکمل ہوگی۔ کیونکہ اس حدیث میں «كل صلاة لا يقرأ فيها بفاتحة الكتاب فهي خداج» کہا گیا ہے اور «خداج» ‏‏‏‏کا معنی”ناقص ہونا“ اور ”ادھورا ہونا“ ہے۔

فائدہ:
اس حدیث سے ثابت ہوا کہ جن نمازوں میں قرأت جہری ثابت ہے، ان میں قرأت جہری کی جائے گی، اور وہ نماز مغرب، نماز عشاء، اور نماز فجر ہیں۔ اور جن نمازوں میں قرٱت مخفی ثابت ہے ان میں سری قرٱت ہی کی جائے گی اور وہ نماز ظہر اور نماز عصر ہیں۔ نیز ہر نماز میں سورۃ الفاتحہ کی فضیلت ثابت ہوتی ہے، کچھ بحث پہلے گزر چکی ہے۔

حدیث حاشیہ:
فوائد ومسائل:
حضرت ابو ہریرہ رضی اللہ تعالیٰ عنہ کے قول سے معلوم ہوتا ہے،
فاتحہ پڑھے بغیر چارہ نہیں ہے اور اس سے زائد پڑھنا اجرو ثواب اور فضیلت کا باعث ہے،
اگرچہ نماز صرف فاتحہ ہی سے ہو جائے گی۔

حدیث حاشیہ:
(1)
بعض روایات میں حضرت ابو ہریرہ ؓ نے اس حدیث کو مرفوعاً بیان کیا ہے جس کے الفاظ یہ ہیں کہ نماز قراءت کے بغیر نہیں ہوتی۔
مسند ابی عوانہ میں یہ روایت بایں الفاظ ہے کہ میں نے آپ سے سنا، آپ ﷺ فرما رہے تھے کہ فاتحہ کے بغیر نماز نہیں ہوتی، بہر حال یہ روایت مرفوع کے حکم میں ہے۔
امام بخاری ؒ کا مدعا بایں طور ثابت ہے کہ ہر نماز میں قراءت ہے، نماز فجر بھی انھی نمازوں میں سے ہے، لہٰذا اس میں بھی قراءت ہے۔
روایت کے آخری حصے میں یہ اضافہ ہے کہ اگر تو امام ہے تو مقتدی حضرات کا خیال رکھتے ہوئے نماز میں تخفیف کر اور اگر تو اکیلا ہے تو جس قدر تو چاہے نماز کو لمبا کر اور ہر نماز میں قراءت ہے جیسا کہ مسند ابی یعلی میں ہے۔
(2)
اس روایت سے معلوم ہوا کہ جو شخص نماز میں فاتحہ نہیں پڑھتا اس کی نماز نہیں ہوتی اور فاتحہ کے علاوہ زائد پڑھنا مستحب ہے۔
اگرچہ بعض صحابۂ کرام رضی اللہ عنہم کے ہاں فاتحہ کے علاوہ دیگر آیات کا پڑھنا بھی ضروری ہے۔
حضرت عثمان بن ابی العاص ؓ کا یہی موقف ہے۔
بہر حال حضرت ابو ہریرہ ؓ کی اس روایت کا بظاہر تقاضا یہ ہے کہ فاتحہ کے بغیر نماز نہیں ہوتی اور اس کے علاوہ یگر آیات کا تمام رکعات میں پڑھنا مستحب ہے، ضروری نہیں۔
(فتح الباري: 327/2)