773۔ اردو حاشیہ:
حدیث مالک سے مراد پیچھے گزری ہوئی «قعنبي عن مالك» والی حدیث نمبر [769] ہے، معلوم ہوا کہ نماز میں چھینک آئے۔ تو مذکورہ دعا یا «الحمد لله» کہنا مباح ہے۔ ان دونوں احادیث (یعنی سنن ابی داود حدیث نمبر 770۔ اور 773) کو جمع کرنے سے معلوم ہوتا ہے کہ شاید رکوع سے اٹھنے اور چھینک آنے کا وقت ایک ہی تھا کہ جناب رفاعہ رضی اللہ عنہ نے یہ کلمات کہے تھے۔

تخریج الحدیث: [وأخرجه البخاري 799، من حديث مالك به]
تفقه:
➊ رکوع کے بعد «رَبَّنَا وَلَكَ الْحَمْد» اور «رَبَّنَا لَكَ الْحَمْد» دونوں طرح کہنا جائز ہے جیسا کہ دوسری روایات سے ثابت ہے لیکن بہتر یہی ہے کہ «رَبَّنَا وَلَكَ الْحَمْدُ، حَمْدًا كَثِيْرًا طَيِّبًا مُبَارَكًا فِيْهِ» پڑھا جائے، اس کا ثواب بہت زیادہ ہے۔
➋ امام ہو یا مقتدی سب کو «سَمِعَ اللهُ لِمَنْ حَمِدَهُ» ۔ اور «رَبَّنَا وَلَكَ الْحَمْدُ» إلخ کہنا چاہئے جیسا کہ دوسرے دلائل سے ثابت ہے۔ دیکھئے [سنن الدارقطني 1/339، 340، ح1270، وسنده حسن]
➌ اجتہاد جائز ہے۔
➍ ذکر کرنے سے نماز فاسد نہیں ہوتی اگرچہ وہ ذکر اپنے اجتہاد سے کیا جائے بشرطیکہ یہ کتاب وسنت کے مخالف نہ ہو۔
➎ اللہ تعالیٰ اپنے نبی صلی اللہ علیہ وسلم کو فرشتے دکھا دیتا تھا جب کہ عام لوگ انہیں دیکھ نہیں سکتے تھے۔
➏ آواز سننے کے باوجود آدمی کو نہ پہچاننا اور پھر اس کے بارے میں لوگوں سے پوچھنا اس با ت کی دلیل ہے کہ نبی صلی اللہ علیہ وسلم غیب نہیں جانتے تھے۔

770۔ اردو حاشیہ:
رکوع سے اٹھ کر مذکورہ دعا کر پڑھنا مستحب ہے۔
مگر تمام ہی مقتدی اونچی آواز سے پکار کر پڑھیں، صحابہ رضوان اللہ عنہم اجمعین سے اس کا ثبوت نہیں ملتا۔ اس لئے تمام مقتدیوں کے لئے ان کلمات کو بہ آواز بلند کہنے کا پابند کرنا صحیح نہیں، نہ اس حدیث سے اس کا اثبات ہی ہوتا ہے، اس سے صرف ان کلمات کی فضیلت اور اسے اس موقع پر پڑھنے کا اثبات ہوتا ہے نہ کہ تمام مقتدیوں کا اونچی آواز سے پڑھنے کا نیز دیکھئے سنن ابی داود حدیث۔ [773]

932 ۔ اردو حاشیہ:
➊ چھینک مارنے اور رکوع سے سر اٹھانے کا وقت ایک ہی تھا جیسا کہ صحیح بخاری میں اس کی صراحت ہے۔ دیکھیے: [صحیح البخاري، الأذان، حدیث: 799]
➋ چھینک بھی اللہ تعالیٰ کی نعمت ہے۔ اس سے دماغ کھل جاتا ہے۔ طبیعت چست ہو جاتی ہے، اس لیے اللہ تعالیٰ کا شکر ادا کرنا چاہیے۔ اس کے لیے صرف الحمدللہ کہنا کافی ہے۔ مزید اضافہ ہو جائے تو کوئی حرج نہیں جیسے کہ اس روایت میں ہے۔
➌ پہلی دفعہ جواب نہ دینا، اس ڈر کی بنا پر تھا کہ شاید میں نے غلطی کی ہے۔
➍ اس روایت سے استدلال کیا جاتا ہے کہ نماز کے دوران میں چھینک آنے پر جہراً الحمدللہ کہنا بھی درست ہے۔ واللہ أعلم۔
➎ جب امام اپنے مقتدیوں میں کوئی نئی چیز محسوس کرے تو اس کے متعلق دریافت کرے اور مقتدیوں کو حقیقت حال سے آگاہ کرے۔
➏ نماز میں چھینک مارنے والا الحمدللہ کہے تو اس کا جواب نہیں دیا جائے گا کیونکہ رسول اللہ صلی اللہ علیہ وسلم اور صحابہ میں سے کسی نے اس آدمی کا جواب نہیں دیا تھا۔ اگر کوئی شخص جواب دے گا تو اس کی نمازباطل ہو جائے گی۔ واللہ اعلم۔
➐ اس حدیث مبارکہ سے مذکورہ ذکر کی فضیلت بھی واضح ہوتی ہے کہ اللہ تعالیٰ کو یہ ذکر بہت پسند ہے۔

1063۔ اردو حاشیہ:
➊ ان روایات میں مقتدی کے لیے «سَمِعَ اللَّهُ لِمَنْ حَمِدَهُ» کہنے کی نفی ہے نہ ذکر و اثبات، اس لیے دیگر مفصل روایات کی طرف رجوع لازمی ہے، جیسا کہ حدیث: 1063 کے فوائد کے تحت گزر چکا ہے۔
➋ بعض حضرات نے اس روایت سے ان کلمات کو بلند آواز سے کہنے پر استدلال کیا ہے مگر حیرانی ہے کہ انہوں نے رسول اللہ صلی اللہ علیہ وسلم اور جلیل القدر صحابہ کے طرز عمل کو نظر انداز کر دیا جو آہستہ پڑھتے تھے اور ایک صحابی کے اتفاقی فعل سے استدلال کر لیا، حالانکہ قرین قیاس یہ ہے کہ یہ فعل اس صحابی سے بے اختیار یا اتفاقاً صادر ہوا تھا۔ اگر یہ عام معمول ہوتا تو رسول اللہ صلی اللہ علیہ وسلم استفسار کیوں فرماتے؟ لٰذا یہ کلمات آہستہ ہی کہنے چاہئیں۔

اردو حاشہ:
1؎:
حافظ ابن حجر فتح الباری میں فرماتے ہیں:
”و أفاد بشر بن عمر الزهراي في روايته عن رفاعة بن يحيى أن تلك الصلاة كانت المغرب“ (یہ مغرب تھی) یہ روایت ان لوگوں کی تردید کرتی ہے جنہوں نے اسے نفل پر محمول کیا ہے۔
مگر دوسری روایات سے یہ بات معلوم ہوتی ہے کہ صحابی نے یہ الفاظ رکوع سے اٹھتے وقت کہے تھے اور اسی دوران اُنہیں چھینک بھی آئی تھی،
تمام روایات صحیحہ اور اس ضمن میں علماء کے اقوال کی جمع و تطبیق یہ ہے کہ اگر نماز میں چھینک آئے تو اونچی آواز سے ((الْحَمْدُ لِلَّهِ)) کہنے کی بجائے جی میں کہے۔

نوٹ:
(سند حسن ہے،
لیکن شواہد کی بنا پر حدیث صحیح ہے)

حدیث حاشیہ:
(1)
روایات سے معلوم ہوتا ہے کہ مذکورہ کلمات کہنے والے خود راوئ حدیث حضرت رفاعہ بن رافع رضی اللہ عنہ تھے، نیز اس حدیث سے معلوم ہوتا ہے کہ تسمیع وظیفۂ اعتدال، یعنی قومے کا وظیفہ ہے جبکہ حدیث ابو ہریرہ ؓ میں اسے وظیفۂ انتقال بتایا گیا ہے اور معروف بھی یہی ہے۔
تطبیق کی یہ صورت ہے کہ جب رسول اللہ ﷺ نے رکوع سے سر اٹھانا شروع کیا تو سمع الله لمن حمده کہنے کی ابتدا کی اور حالت قومہ میں اس کی تکمیل ہوئی۔
(فتح الباري: 2/ 369، 370) (2)
اس حدیث سے معلوم ہوا کہ نماز میں غیر ماثور اذکار کا اضافہ جائز ہے بشرطیکہ مسنون اذکار کے مخالف نہ ہوں۔
حافظ ابن حجر رحمہ اللہ نے بھی اسی موقف کو اختیار کیا ہے۔
(فتح الباري: 2/ 371)
لیکن صحیح بات یہ ہے کہ ان حالات میں ایسا کرنا درست نہیں، البتہ زمانۂ نبوت میں ایسا کرنا جائز تھا کیونکہ نزول وحی کا زمانہ تھا اور باطل، حق کی صورت میں قائم نہیں رہ سکتا تھا لیکن انقطاع وحی کے بعد جبکہ شریعت مکمل ہو چکی ہے عبادات میں ایسے الفاظ کی زیادتی جو شریعت سے ثابت نہ ہو، محل نظر ہے۔