437۔ اردو حاشیہ:
➊ رسول اللہ صلی اللہ علیہ وسلم بشری تقاضوں سے بالا نہ تھے۔ اس لیے سفری تکان کے باعث آرام کے لیے اترے۔
➋ اس کے باوجود نماز بروقت ادا کرنے کی فکر دامن گیر رہی اور بلال رضی اللہ عنہ کو اس کام کے لیے پابند فرمایا۔ اور اس قسم کے عوارض کے موقع پر نماز کے لیے جاگنے کا اہتمام کر کے سونا چاہیے۔
➌ انسان کو کسی تقصیر پر معذرت کرنی پڑے تو خوبصورت انداز میں کرے۔
➍ مذکورہ اسباب کی وجہ سے کسی جگہ کو منحوس اور بےبرکت سمجھنا جائز ہے جیسے کہ رسول اللہ صلی اللہ علیہ وسلم نے اس جگہ کو چھوڑ دیا تھا۔
➎ قضا نمازوں کے لیے جماعت کی صورت میں اذان کہنا بھی مستحب ہے۔ پھر تکبیر کہی جائے اور جماعت کرائی جائے۔ لیکن اذان کا یہ استحاب صرف سفر اور بے آباد علاقوں ہی کے لیے ہے۔ عام مسجدوں میں (جو آبادیوں میں ہوں) وہاں بےوقت اذان دینا عوام کے لیے اضطراب اور تشویش کا باعث ہو گا۔ ہاں اگر وہاں آہستگی سے مسجد کی چار دیواری کے اندر اس طرح اذان دے لی جائے کہ باہر آواز نہ جائے، تو وہاں بھی اس پر عمل کیا جا سکتا ہے۔
➏ سوتے رہ جانے یا بھول جانے کا قصور معاف ہے۔ اور ایسی نمازوں کے لیے وقت وہی ہے جب جاگے یا یاد آئے اور جب وقت نکل ہی ‎گیا تو شرعی ضرورت کے تحت قدرے تاخیر کر لینا بھی جائز ہے جیسے کہ نبی صلی اللہ علیہ وسلم نے اگلی وادی میں جا کر نماز پڑھی۔
➐ فجر کی سنتیں دیگر سنتوں کے مقابلے میں زیادہ اہم ہیں کہ سفر میں بھی نہیں چھوڑی گئیں۔

617 ۔ اردو حاشیہ:
➊ اس روایت میں نیند آنے کو کوتاہی اور قصور شمار نہیں کیا گیا جب کہ اس باب کی پہلی حدیث میں ”کفارہ“ کے الفاظ ہیں۔ ظاہر ہے کفارہ تو کسی غلطی کے بعد ہی ہوتا ہے، گویا نیند کا آنا بذات خود تو کوتاہی یا غلطی نہیں مگر سستی، غفلت اور عدم محافظت جو نیند کا سبب ہیں، کوتاہی کے ذیل میں آتے ہیں۔
➋ ”اگلی نماز کا وقت آنے تک“ عام طور پر پچھلی نماز کا وقت اگلی نماز کا وقت آنے سے ختم ہوتا ہے، اس لیے یوں کہا: ورنہ مقصد نماز کا وقت ختم ہونا ہے، مثلاً: صبح کی نماز کا وقت ختم ہوتا ہے تو کسی فرض نماز کا وقت شروع نہیں ہوتا، چنانچہ وقت ختم ہونے تک صبح کی نماز نہ پڑھنا جرم اور گناہ ہے، البتہ جہاں شریعت نے تاخیر کی رخصت دی ہے وہاں یہ حدیث لاگو نہیں ہو گی، مثلاً: مسافر دو نمازیں جمع کر سکتا ہے۔ کبھی تاخیر واجب ہوتی ہے، جیسے مزدلفہ میں مغرب کی نماز۔ دیکھیے: [صحیح البخاري، الحج، حدیث: 1675، وصحیح مسلم، الحج، حدیث: 1218]

سو جانے والے شخص کی نماز
«مَنْ نَامَ عَنْ صَلَاةٍ أَوْ سَهَا عَنْهَا فَوَقْتُهَا حِيْنَ يَذْكُرُهَا»
جو شخص سو گیا یا اسے نماز پڑھنا بھول گیا تو اس کی نماز کا وقت وہی ہے جب اسے یاد آ جائے۔ ۱؎
۱؎ ➊ حضرت ابو قتادہ رضی اللہ عنہ سے مروی ہے کہ نبی صلی اللہ علیہ وسلم نے فرمایا «فإذا نسى أحدكم صلاة أو نام عنها فليصلها إذا ذكرها» ”جب تم میں سے کوئی نماز پڑھنا بھول جائے یا سویا رہ جائے تو جب اسے یاد آئے نماز پڑھ لے۔“
[مسلم 681، كتاب المساجد و مواضع الصلاة: باب قضاء الصلاة الفائتة...، أبو داود 438، نسائي 294/1، ترمذي 177، ابن ماجة 698، أحمد 298/5، ابن خزيمة 95/2، ابن الجارود 153، دارقطني 386/1]
➋ حضرت انس رضی اللہ عنہ سے مروی ہے کہ نبی صلی اللہ علیہ وسلم نے فرمایا: «من نسى صلاة فليـصـلـهـا إذا ذكرها لا كفارة لها إلا ذلك» ”جو شخص نماز پڑھنا بھول جائے تو جب اسے یاد آئے نماز پڑھ لے، اس کا کفارہ صرف یہی ہے۔“
[أحمد 269/3، بخاري 597، كتاب مواقيت الصلاة: باب من نسى صلاة فليصل إذا ذكر ...، مسلم 684، ترمذي 178، ابن ماجة 696، نسائي 293/1، أبو داود 442، أبو عوانة 385/1، دارمي 280/1، ابن خزيمة 993، بيهقي 218/2]
➌ حضرت ابو ہریرہ رضی اللہ عنہ سے مروی ہے کہ نبی صلی اللہ علیہ وسلم نے فرمایا ”جسے نماز پڑھنا بھول جائے تو جب اسے یاد آئے نماز پڑھ لے“ کیونکہ اللہ تعالیٰ نے فرمایا ہے کہ «اقيم الصَّلَاةَ لِذِكْرِى» [طه: 14] ”نماز اس وقت ادا کرو جب میری یاد آئے۔“
[مسلم 680، كتاب المساجد .......، أبو داود 435، نسائي 296/1، ابن ماجة 697، أبو عوانة 253/2، بيهقي 217/2]
ان احادیث کے مفہوم مخالف سے معلوم ہوتا ہے کہ جان بوجھ کر نماز چھوڑنے والا شخص قضائی نہیں دے گا کیونکہ یہ بات اصول میں مسلم ہے کہ «انتفاء الشرط يستلزم انتفاء المشروط» ”شرط کا نہ ہونا مشروط کے نہ ہونے کو لازم ہے۔“
اس سے یہ لازم آتا ہے کہ جو شخص بھولا نہیں وہ بطور قضاء نماز نہیں پڑھے گا۔
امام ابن حزمؒ نے یہی موقف اختیار کیا ہے۔ اس سے یہ بھی معلوم ہوا کہ سونے والے یا بھول جانے والے شخص کو جب یاد آئے اسے فوراََ بلا تاخیر نماز ادا کر لینی چاہیے کیونکہ اس کا وقتِ ادا وہی ہے نیز یہ بھی پتہ چلتا ہے کہ ان دونوں حالتوں میں انسان مکلف نہیں ہوتا جیسا کہ اجماع سے بھی یہ بات ثابت ہے۔ [نيل الأوطار 486/1-488]
. . . اصل مضمون کے لئے دیکھئے . . .
فقہ الحدیث از عمران ایوب لاہوری، جلد اول، ص 314