صحيح مسلم, حدیث نمبر 7103, باب: شیطان کا فساد مسلمانوں میں۔

حافظ زبير على زئي رحمه الله، فوائد و مسائل، تحت الحديث مشكوة المصابيح 72

´اہل عرب سے شیطان کی مایوسی`
«. . . ‏‏‏‏وَعَنْ جَابِرٍ قَالَ سَمِعْتُ النَّبِيَّ صَلَّى اللَّهُ عَلَيْهِ وَسَلَّمَ يَقُولُ: «إِن الشَّيْطَان قد أيس أَنْ يَعْبُدَهُ الْمُصَلُّونَ فِي جَزِيرَةِ الْعَرَبِ وَلَكِنَّ فِي التحريش بَينهم» . رَوَاهُ مُسلم . . .»
”. . . اور انہی سیدنا جابر رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”شیطان اس بات سے اب ناامید ہو گیا ہے کہ جزیرہ عرب میں نمازی یعنی مومن موحد اس کی پوجا پاٹ کریں یعنی بت پرستی کرنے لگ جائیں البتہ لوگوں کو ورغلا کر لڑائی جھگڑے میں مبتلا کرتا رہے گا۔“ اس حدیث کو مسلم نے روایت کیا ہے۔ . . .“ [مشكوة المصابيح/كِتَاب الْإِيمَانِ: 72]

تخریج:
[صحيح مسلم 7103]

فقہ الحدیث:
➊ یہ حدیث اس سلسلے میں بہت واضح ہے کہ صحابہ کرام شرک نہیں کریں گے اور واقعتاً ایسا ہی ہوا۔ کسی صحابی سے بھی اسلام لانے کے بعد شرک ثابت نہیں ہے۔ «والحمدلله»
➋ اس حدیث میں صحابہ کرام کی باہمی لڑائیوں مثلاً جنگ جمل اور جنگ صفین کی طرف اشارہ ہے۔
➌ یہ کہنا کہ بعض امت مسلمہ میں یا جزیرہ عرب میں قیامت تک شرک واقع نہیں ہو گا، بے دلیل دعویٰ ہے، جس کے لئے بعض احادیث کے مفہوم میں رد و بدل کرنے کی کوشش کی جاتی ہے، جبکہ صحیح احادیث سے یہ ثابت ہے کہ امت مسلمہ کے بعض افراد میں شرک کا وقوع ہو گا، مثلاً:
رسول اللہ صلی اللہ علیہ وسلم نے فرمایا:
«لا تقوم الساعة حتيٰ تضطرب أليات نساء دوس عليٰ ذي الخلصة.»
”اس وقت تک قیامت نہیں ہو گی جب تک دوس (قبیلے) کی عورتیں جسم مٹکاتے ہوئے ذوالخلصہ (قبیلہ دوس کے بت اور طاغوت) کا طواف نہیں کریں گی۔“ [صحيح بخاري: 7116 و صحيح مسلم: 2906]
↰ اس حدیث سے ثابت ہوا کہ جزیرہ عرب میں قیامت سے پہلے شرک کیا جائے گا۔

رسول اللہ صلی اللہ علیہ وسلم نے فرمایا:
«ولا تقوم الساعة حتىٰ تلحق قبائل من أمتي بالمشركين وحتىٰ تعبد قبائل من أمتي الأوثان»
”اور اس وقت تک قیامت قائم نہیں ہو گی جب تک میری امت کے (کچھ) قبائل مشرکوں سے نہ مل جائیں گے اور جب تک میری امت کے (کچھ) قبائل بتوں کی عبادت نہ کریں گے۔“ [سنن ابي داود: 4252 وسنده صحيح]
↰ اس حدیث سے معلوم ہوا کہ امت محمدیہ میں بعض لوگ شرک کریں گے۔

ایک صحیح روایت میں آیا ہے کہ رسول اللہ صلی اللہ علیہ وسلم نے فرمایا:
«ما أخاف عليكم أن تشركوا»
”مجھے یہ ڈر نہیں ہے کہ تم شرک کرو گے۔“ [صحيح بخاري: 1344 و صحيح مسلم: 2296]
اس حدیث کی تشریح میں:
◈ حافظ ابن حجر العسقلانی لکھتے ہیں:
«أي علىٰ مجموعكم، لأن ذلك قد وقع من البعض أعاذنا الله تعالىٰ»
”یعنی بالاجماع تم شرک نہیں کرو گے، کیونکہ اس (شرک) کا وقوع بعض (امتیوں) سے ہوا ہے۔ اللہ ہمیں پناہ میں رکھے۔“ [فتح الباري 3؍211]
◈ نووی نے کہا:
«وأنها لا ترتد جملة»
”اور بے شک وہ (امت) بالاجماع مرتد نہیں ہو گی۔“ [شرح صحيح مسلم للنووي، درسي نسخه ج2 ص250]
◈ عینی حنفی نے کہا:
«معناه عليٰ مجموعكم لأن ذلك قد وقع من البعض والعياذ بالله تعاليٰ»
”اس کا معنی یہ ہے کہ تم بالاجماع شرک نہیں کرو گے، کیونکہ اس (شرک) کا وقوع بعض سے ہوا ہے اور اللہ تعالیٰ اپنی پناہ میں رکھے۔“ [عمدة القاري ج8 ص157]
◈ کرمانی نے کہا:
«وأنها لا ترتد جملة وقد عصمها من ذلك»
”اور وہ (امت) بالاجماع مرتد نہیں ہو گی اور یقیناً اس (اللہ) نے اسے محفوظ رکھا ہے۔“ [شرح صحيح البخاري للكرماني 7؍123 ح1346؍1267]
◈ قسطلانی نے کہا:
«أي ما أخاف علىٰ جميعكم الإشراك بل علىٰ مجموعكم لأن ذلك قد وقع من بعض»
”یعنی مجھے تم سب (امتیوں) کا بالاجماع شرک کرنے کا خوف نہیں، کیونکہ بعض لوگوں سے اس (شرک) کا وقوع ہوا ہے۔“ [قسطلاني شرح صحيح البخاري ج2 ص440]
◈ غلام رسول سعیدی بریلوی لکھتے ہیں:
”یعنی آپ کو اس کا خدشہ نہیں تھا کہ پوری امت مشرک ہو جائے گی، سو بعض لوگوں کا مرتد ہو کر ہندو یا عیسائی ہو جانا اس حدیث کی پیش گوئی کے خلاف نہیں ہے۔“ [شرح صحيح مسلم ج6 ص738]
ان تصریحات سے معلوم ہوا کہ پوری امت کبھی بالاجماع شرک نہیں کرے گی۔ تاہم ایسا ہو گا کہ بعض امتی شرک کریں گے لہٰذا جو لوگ یہ کہتے ہیں کہ امت محمدیہ میں شرک واقع نہیں ہو گا، ان کا قول (صحیح بخاری، صحیح مسلم اور) سنن ابی داود کی صحیح حدیث اور شارحین حدیث کی تصریحات اور خود بریلوی تحقیقات کے بھی خلاف ہے۔ تفصیل کے لئے دیکھئے: [ماہنامہ الحدیث حضرو عدد 49 تا 56] میں شائع شدہ محترم ابوالاسجد محمد صدیق رضا حفظہ اللہ کا تحقیقی مضمون: ”امت مصطفیٰ صلی اللہ علیہ وسلم اور شرک“ اس مضمون کا مطالعہ بے حد مفید ہے اور اس سے دور جدید میں مبتدعین بریلویہ کے تمام شبہات کا ازالہ ہو جاتا ہے۔ «والحمدلله»