فوائد:
➊ یہ حدیث دلیل ہے کہ دو مٹکے سے زائد پانی میں اگر نجاست گر پڑے تو وہ محض نجاست واقع ہونے سے ناپاک نہیں ہوتا، بلکہ اس میں نجاست سمونے کی صلاحیت موجود ہوتی ہے، البتہ اگر دو مٹکے سے زائد پانی میں اتنی نجاست گرے کہ تینوں اوصاف یعنی رنگ، بو، ذائقہ، میں سے کوئی وصف تبدیل ہو جائے تو وہ پانی نجس ہو جائے گا، نیز دو مٹکوں سے کم پانی میں محض نجاست واقع ہونے سے وہ پانی ناپاک ہو جاتا ہے، چنانچہ ابن عمر رضی اللہ عنہما مجاہد، شافعیہ، احناف احمد بن حنبل، اسحاق بن راہویہ اور اہل بیت میں سے ہادی موید باللہ ابو طالب اور ناصر کا موقف ہے یہ قلیل (دو مٹکوں سے کم) پانی مجرد نجاست واقع ہونے سے ناپاک ہو جاتا ہے۔ ان کے دلائل حسب ذیل ہیں:
1. «وَالرُّجْزَ فَاهْجُرُ» ”اور گندگی ترک کر دیجئے۔“ [المدثر: 5]
2. نیند سے بیدار ہو کر تین مرتبہ ہاتھ دھونے کی روایت۔ [ابن خزيمه: 99]
3. وہ روایت جس میں بیان ہے کہ کتا برتن میں منہ ڈال دے تو اسے سات مرتبہ دھونا فرض ہے۔ [ابن خزيمه: 90]
4. کھڑے پانی میں کوئی پیشاب نہ کرے۔ [ابن خزيمه: 90]
5. حدیث الباب۔
6. مسند احمد ابو یعلی طبرانی اور مستخرج ابونعیم کی مرفوع روایت کہ اپنے دل سے فتویٰ طلب کر خواہ تجھے مفتیان کرام کوئی فتویٰ دیں۔
7. نسائی، احمد، ابن حبان، حاکم اور ترمذی میں مروی حدیث کہ شک ترک کر دیجئے حتٰی کہ شک باقی نہ رہے۔
ان علماء کا موقف ہے کہ مذکورہ بالا احاديث «الْمَاءُ طُهُورٌ لا يُنجسه شيء» کی تخصیص کرتی ہیں کہ دو مٹکے سے زائد پانی میں جب تک اتنی نجاست نہ گرے جو اس کے رنگ، بو اور ذائقہ کو تبدیل کر دے، پانی ناپاک نہیں ہوتا اور دومٹکوں سے کم پانی میں محض نجاست گرنے سے پانی نجس ہو جاتا ہے۔
[نيل ولا وطار: 39/1]
➋ ابن قدامہ حنبلی کہتے ہیں: یہ مسئلہ صریح دلیل سے ثابت ہے کہ دو مٹکوں کی مقدار کے برابر پانی میں نجاست گرنے سے وہ پانی نجس نہیں ہوتا لیکن نجاست واقع ہونے سے اس کے اوصاف تبدیل ہو جائیں تو پانی ناپاک ہو جاتا ہے خواہ اس کی مقدار کثیر ہی ہو۔ اور دو مٹکوں سے کم پانی میں مجرد نجاست گرنے سے وہ پانی ناپاک ہو جاتا ہے اگرچہ اس کے اوصاف تبدیل نہ ہی ہوں، نیز نجاست واقع ہونے سے جس پانی کے اوصاف تبدیل ہو جائیں وہ نجس ہو جاتا ہے اس میں کوئی اختلاف نہیں ہے۔
ابن منذر بیان کرتے ہیں۔ اہل علم کا اس مسئلہ پر اجماع ہے کہ قلیل و کثیر پانی میں اتنی نجاست واقع ہو جائے، جو اس کے ذائقے رنگ یا بو کو تبدیل کر دے تو وہ پانی اس حالت میں ہمیشہ نجس رہتا ہے۔
[المغنى مع الشرح الكبير: 53/1]
➌ ابن قدامہ حنبلی بیان کرتے ہیں: قلتین (دومٹکوں) کی تحدید دلیل ہے کہ دو مٹکوں سے قلیل مقدار میں پانی (نجاست گرنے سے) نجس ہو جاتا ہے کیونکہ اگر دو مٹکوں کے برابر پانی اور دو مٹکوں سے کم پانی کا حکم مساوی ہوتا تو تحدید چنداں مفید نہ تھی۔ [المغنى مع الشرح الكبير: 54/1]