فوائد:
➊ شرمگاہ کو کسی پردہ اور رکاوٹ کے بغیر ہاتھ لگانے سے وضو ٹوٹ جاتا ہے چنانچہ ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا:
«اذا أَفْضَى أَحَدُكُمْ بِيَدِهِ إِلَى فَرْجِهِ، وَلَيْسَ بِيْنَهُمَا سِتْرَ وَلَا حِجَابٌ فَلْيَتَوَضَّأُ»
”جب تم میں سے کوئی شخص اپنا ہاتھ اپنی شرمگاہ تک لے جائے اور ہاتھ اور شرمگاہ کے درمیان کوئی پردہ یا حجاب نہ ہو تو وہ وضو کرے۔“ [ابن حبان: 1118، بيهقي: 1/ 133، دار قطني: 53، اسناده صحيح]
➋ مرد و عورت اس حکم میں یکساں حیثیت رکھتے ہیں عبد اللہ بن عمرو بن عاص سے مروی ہے کہ نبی صلی اللہ علیہ وسلم نے فرمایا:
«أَيْمَا رَجُلٍ مَسَّ فَرْجَهُ فَلْيَتَوَضَّا، وَأَيُّمَا امْرَأَةٍ مَسَّتْ فَرْجَهَا فَلْتَتَوَضًا»
”جو بھی مرد اپنی شرمگاه کو چھوئے وہ وضو کرلے اور جو عورت اپنی شرمگاہ کو ہاتھ لگائے وہ وضو کرے۔“
[بيهقي: 1/ 132، مسند احمد: 223/2، دار قطني: ص 54، صحيح الجامع: 2725، صحيح]
➌ چھوٹے بچے کی شرمگاہ کو ہاتھ لگنے سے بھی وضو ٹوٹ جاتا ہے، چنانچہ سعودی فتویٰ کمیٹی کا فتویٰ ہے کہ کسی پردہ و حجاب کے بغیر شرمگاہ کو ہاتھ لگنے سے وضو ٹوٹ جاتا ہے خواہ جس کی شرمگاہ کو ہاتھ لگا ہے، وہ چھوٹا ہو یا بڑا، کیونکہ نبی صلی اللہ علیہ وسلم کا فرمان ہے کہ جو شخص اپنی شرمگاہ کو ہاتھ لگائے وہ وضو کرے۔ نیز کسی اور کی شرمگاہ کو ہاتھ لگنے کا حکم اپنی
شرمگاہ کو ہاتھ لگنے کی طرح ہے۔ [فتاوي اللجنة الدائمة للبحوث العلمية والافتاء: 251/7]