فوائد و مسائل:
یہ حدیث ابوداود، نسائی، ابن حبان اور حاکم میں ہے اور امام حاکم کا کہنا ہے کہ اس کی سند صحیح ہے۔
◈ اور حافظ منذری فرماتے ہیں: اس کی سند میں عبدالکریم نامی راوی ہے جس کو بعض نے عبدالکریم بن ابی المخارق سمجھا ہے۔ جو ضعیف راوی ہے۔ اور اسی بناء پر حدیث کو بھی ضعیف سمجھا ہے۔ لیکن صحیح بات یہ ہے کہ یہ وہ شخص نہیں ہے بلکہ یہ عبدالکریم بن مالک جزری ہے جو ثقہ راوی ہے اور بخاری ومسلم نے اس کی حدیث کو حجت بنایا ہے یعنی پھر حدیث صحیح ہوئی۔
◈ حافظ ابن حجر فرماتے ہیں کہ اس حدیث کی اسناد قوی ہے۔
↰ میں کہتا ہوں کہ ابوداؤد کی سند میں تصریح وارد ہے کہ وہ جزری ہے چنانچہ [سنن ابوداؤد ص 4/ 139] مع عون المعبود میں اس حدیث کی کی سند اس طرح ہے۔
«حدثنا ابوتوبة نا عبيدالله عن عبدالكريم الجزري عن سعيد بن جبير عن ابن عباس فذكره۔ وقال الحافظ ابن حجر فى القول المسدد فى الذب عن مسند الامام احمد ص۴۲ ان الحديث من رواية عبدالكريم الجزري الثقة المخرج له فى الصحيح فقد اخرج الحديث المذكور من هذا الوجه ابوداود، والنسائي وابن حبان والحاكم فى صحيحيهما، واخرجه الحافظ ضياء الدين المقدسي فى الاحاديث المختارة مما ليس فى الصحيحين من هذا الوجه ايضاً۔»
◈ ”اور حافظ ابن حجر القول المسدد میں فرماتے ہیں: یہ حدیث عبدالکریم جزری کے واسطے سے ہے جو کہ ثقہ ہے اور اس کی حدیثیں صحیح میں روایت کی گئی ہیں اور اسی کے واسطے سے یہ حدیث ابوداؤد اور نسائی کے علاوہ ابن حبان، حاکم، ضیاء مقدسی نے بھی اپنی صحاح میں روایت کیا ہے تو پھر صحت کی سند میں کوئی شبہ نہیں رہا۔“
◈ اور علامہ شمس الحق عظیم آبادی [عون المعبود ص 4/ 140] میں فرماتے ہیں:
«قال انه عبدالكريم الجزري وعبدالكريم بن ابي المخارق من اهل البصرة نزل مكة وايضا فان الذى روي عن عبدالكريم هذا الحديث هو عبيد الله بن عمرو الرقي وهو مشهور بالرواية عن عبدالكريم الجزري وهو ايضا من اهل الجزيرة۔ والله عزوجل اعلم»
”کہ جو لوگ کہتے ہیں کہ یہ عبدالکریم جزری ہے۔ انہیں کا قول قوی ہے کیونکہ وہ اور اس کا شاگرد اس حدیث میں دونوں اہلِ جزیرہ میں سے ہیں اور وہی جزری سے روایت کرنے میں مشہور ہیں۔ یہ حدیث اپنے مطلب میں واضح ہے۔ اس قسم کی سختی حرام کام کے لئے ہو سکتی ہے۔“
◈ امام مندزی [الترغيب والترهيب 118/3] میں اس حدیث پر عنوان اس طرح باندھتے ہیں:
«الترهيب من خضب اللحية بالسواد»
”یعنی کالے خضاب کرنے والے کو ڈرانے کے بیان میں۔“
◈ اور تحفۃ الحوذی میں ہے:
«وهذا الحديث صريحاني حرمة الخضاب بالسواد»
”کہ یہ حدیث کالے رنگ کے خضاب کو حرام کرنے میں بالکل صریح اور واضح ہے۔“

فوائد ومسائل:
بالوں کی سفیدی کو سیاہی میں بدلنا حرام ہے۔
مردوں اور عورتوں سب کے لیئے ایک ہی حکم ہے۔
مہندی یا کتم سے جائز ہے۔

اردو حاشہ:
(1) بالوں کو رنگنے کے حوالے سے نوجوان لڑکے اور لڑکیاں فی زمانہ مختلف بے اعتدالیوں کا شکار ہیں، مثلاً: بالوں وغیرہ کو ڈائی کرانا، یعنی جیسا لباس ویسے ہی بالوں کی رنگت اور اسی طرح آنکھوں میں، ڈائی شدہ بالوں اور لباس کی مناسبت سے لینزوغیرہ لگوانا۔ یہ کام نہ صرف نا جائز ہیں بلکہ اس میں کفار کی عورتوں کے ساتھ مشابہت بھی یقینی ہے۔ اس کے ساتھ ساتھ یہ تغییر لخلق اللہ بھی ہے، یعنی اللہ کی تخلیق کو بدلنا اور اس میں تبدیلی کرنا بھی ہے، لہٰذا اہل اسلام کی یہ شرعی اور اخلاقی ذمہ داری ہے کہ وہ اپنی بہو، بیٹیوں، اور دیگر متعلقہ خواتین کو اس قبیح کام سے روکیں، انہیں اللہ تعالی، اس کے رسول اللہ ﷺ اور قرآن و حدیث کی صریح مخالفت کرنے سے باز رکھیں اور آخرت کی۔ معاذ اللہ۔ ناکامی ونامرادی کا خوف دلائیں۔ اغیار، یعنی غیر مسلموں، یہودیوں، عیسائیوں اور ہندوؤں وغیرہ کی دیکھا دیکھی، نیز”روشن خیالی“ کے نام پر ہم روز بروز دین سے دور سے دور تر ہوتے جا رہے ہیں اور اپنی اولاد کو جہنم کا ایندھن بنا رہے ہیں اور یہ سب کچھ ٹھنڈے پیٹوں برداشت کررہے ہیں۔ اللہ تعالی ہمیں اس دنیوی و اخروی خسارے سے محفوظ فرمائے۔ آمین۔
(2) سیاہ خضاب کا استعمال حرام ہے، جس کی سزا یہ ہے کہ ایسا انسان جنت کی خوشبو بھی نہیں پا ئے گا۔
(3) مرفوعاً یعنی یہ رسو ل اللہ کا فرمان ہے۔
(4) ”جیسے کبوتروں کے سینے“ کبوتر کا سینہ عموماً سیاہ ہوتا ہے۔ اور مثال عموم کے لحاظ سے ہوتی ہے نہ کہ چند افراد کے لحاظ سے۔
(5) ”خوشبو نہیں پائیں گے“ یعنی جنت میں داخل ہونے کے باوجود یا اولین طور پر جنت میں نہیں جائیں گے بلکہ انہیں سزا بھگتنا ہوگی۔